કલોલ પાસેના જેઠલજ ગામે રહેતો 26 વર્ષીય યુવક ચમનજી વજાજી ઠાકોર અને તેના મિત્રો ખોડાજીભાઈ પુંજાજી તથા અજમલજીભાઈ શનાજી બાઈક નંબર જીજે/18/ડીએચ/2455 લઈને જેઠલજ ગામથી ઇન્દ્રાડ લગ્નમાં જવા નીકળ્યા હતા. તેમનું બાઈક શેરીપા પાસેથી પસાર થઈ રહ્યું હતું તે સમયે સામેથી આવી રહેલ સ્વીફ્ટ કાર નંબર જીજે/18/બીકે/8497ના ચાલક સાબીરભાઈ હાજીભાઈ ઘાંચીએ રોડ પરનો બમ્પ ટાળવા માટે તેની કાર પર રોંગ સાઈડમાં લઈ જઈ સામેથી આવતી બાઈકને ટક્કર મારતા અકસ્માત સર્જાયો હતો.

અકસ્માત સર્જાતા બાઈક પર સવાર ત્રણેય યુવાનોને શરીરે ઈજાઓ પહોંચી હતી. જેમાં ચમનજી વજાજીને ગંભીર ઈજાઓ પહોંચતા તેમને સારવાર માટે કલોલની ખાનગી હોસ્પિટલમાં ખસેડવામાં આવ્યો હતો. જ્યાં તેનું સારવાર દરમિયાન મોત નીપજ્યું હતું અને ઘાયલ અન્ય બે યુવાનોને સારવાર માટે અમદાવાદની હોસ્પિટલમાં ખસેડવામાં આવ્યા હતા.

આ બનાવ અંગે પોલીસે મૃતકના પિતાની ફરિયાદને આધારે કાર ચાલાક વિરુદ્ધ ગુનો નોંધી આગળની કાર્યવાહી હાથ ધરી હતી.