લાતુરમાં કન્ટેનર અને કારની અથડામણથી થયેલા ભીષણ અકસ્માતમાં એક જ પરિવારના ચાર જણ મોતના મુખમાં ધકેલાઇ ગયા હતા. મૃતકમાં ૭૦ વર્ષીય વૃદ્ધા તેના પુત્ર, પુત્રવધુ, પૌત્રનો સમાવેશ છે. અકસ્માત દરમિયાન કન્ટેનર નીચે કાર ઘૂસી જતા મૃતદેહો અંદર દબાઇ ગયા હતા. ક્રેનથી આ મૃતદેહ બહાર કાઢવામાં આવ્યા હતા. બનાવ અંગે પોલીસે ગુનો નોંધી તપાસ હાથ ધરી હતી. સુત્રો પાસેથી મળતી માહિતી અનુસાર, લાતુરના પ્રકાશનગરમાં રહેતા હિરકણાબાઇ પાંડે (ઉ.વ.70) તેમનો પુત્ર ઉમેશ (ઉ.વ.50), પુત્રવધુ સવિતા (ઉ.વ.45), પૌત્ર પ્રતિક (ઉ.વ.23) કામનિમિત્તે બહારગામ ગયા હતા. પછી તેઓ કારમાં પાછા ઘરે આવી રહ્યા હતા. તે દરમિયાન લાતુરમાં ભડાચીવાડી પાસે સવારે સામેથી આવતા કન્ટેનર સાથે કાર ટકરાતા ભીષણ અકસ્માત થયો હતો.અકસ્માતની જાણ થતા સ્થાનિક લોકો અને પોલીસ મદદ માટે પહોંચી ગયા હતા. પોલીસે ક્રેન અને લોકોની મદદથી હિરકણાબાઇ, ઉમેશ, સવિતા, પ્રતિકના મૃતદેહ બહાર કાઢીને પોસ્ટમોર્ટમ માટે હોસ્પિટલમાં મોકલી દીધા હતા. લાતુરના પ્રકાશનગરમાં ઉમેશપાંડે ખાનગી હોસ્ટેલ ધરાવતા હતા પણ કાર પરથી નિયંત્રણ ગુમાવતા આ દુર્ઘટના બની હતી. બનાવને લીધે પાંડે પરિવારમાં શોકની છાયા ફરી વળી હતી. અકસ્માતને લીધે થોડા સમય માટે વાહન વ્યવહાર ઠપ્પ થઇ ગયો હતો. બંને વાહનને રસ્તા પરથી ખસેડવામાં આવ્યા બાદ વાહન વ્યવહાર રાબેતા મુજબ શરૂ થયો હતો.