સુરતના અલથાણ કેનાલ રોડ પર આવેલા કેશવ હાઇટ્સના રામેશ્વર બી વિંગમાં એકાએક વિકરાળ આગ ફાટી નીકળી હતી. આગની ઘટનાથી રહીશોમાં ભાગદોડ મચી જવા પામી હતી. જોકે સ્થાનિકો દ્વારા ફાયરબ્રિગેડના આગ લાગ્યાની જાણ કરતા ટીમ ઘટના સ્થળે પહોંચી હતી અને રેસ્ક્યૂ ઓપરેશન હાથ ધર્યું હતું.

માહિતી મુજબ, અંદાજે 10 માળના કેશવ હાઇટ્સના રામેશ્વર બી વિંગના બીજા માળે અચાનક આગ લાગી હતી. જોતા જોતા આગ અન્ય ફ્લોર સુધી ફેલાઈ ગઈ હતી. આગ એટલી વિકરાળ હતી કે ધૂમાળાના ગોટેગોટા દૂર દૂર સુધી દેખાયા હતા. જ્યારે બી વિંગમાં રહેતા રહીશો આગની ઘટના કારણે ડરી ગયા હતા. જોકે આ અંગે ફાયર બ્રિગેડને જાણ કરવામાં આવી હતી. આથી વેસુ, મજુરા, અડાજણ, માન દરવાજા, પાલનપુર સહિતની ફાયર ટીમ ઘટના સ્થળે પહોંચી હતી અને ત્વરિત આગ પર કાબૂ મેળવવા પાણીનો મારો ચલાવ્યો હતો. જો કે, કલાકોની જેહમત બાદ ફાયર ટીમ દ્વારા આગ નિયત્રણમાં લેવાઈ હતી. જ્યારે બિલ્ડિગમાં ફસાયેલા લોકોને છત પર જવા કહેવાયું હતું.

આગ એટલી વિકરાળ હતી કે તેના કાળા ધૂમાળાથી બિલ્ડિંગના લોકોને શ્વાસ લેવામાં તકલીફ થવા પામી હતી. જોકે ફાયરની ટીમ દ્વારા સમયસર બિલ્ડિંગમાં ફસાયેલા લોકોનું રેસ્ક્યૂ કરવામાં આવ્યું હતું. સદનસીબે આગની ઘટનામાં કોઈ જાનહાનિ થયાના સમાચાર નથી. જો કે, અમુક લોકોને સામાન્ય ઇજા થઈ હોવાની માહિતી છે. બિલ્ડિંગમાં લગભગ 35થી 40 લોકો ફસાયા હોવાની માહિતી છે. છઠ્ઠા માળે એક વૃદ્ધને પગમાં ફેક્ચર થયું હોવાથી તેમને પણ ફાયર વિભાગના લોકો નીચે લઈ આવ્યા હતા. જોકે, આગ લાગવા પાછળનું ચોક્કસ કારણ હાલ જાણી શકાયું નથી. પરંતુ, આગની ઘટનાથી રહીશોમાં ફફડાળ જોવા મળી રહ્યો છે. આગ લાગવા પાછળના કારણની તપાસ કરાઈ રહી છે.