રિઝર્વ બેંક ઓફ ઈન્ડિયા (RBI)નાં નિયમોનું પાલન ન કરતી સહકારી બેંકો સામે કાર્યવાહી કરી છે. RBIના નિયમોનું ઉલ્લંઘન કરવા બદલ ચાર સહકારી બેંકોને દંડ ફટકાર્યો છે, જેમાં હાલોલ અર્બન કો-ઓપરેટિવ બેંક, મહેસાણા જિલ્લા પંચાયત કર્મચારી સહકારી બેંક, નવસર્જન ઈન્ડસ્ટ્રીયલ કો-ઓપરેટિવ બેંક અને સ્તંભદ્રી કો-ઓપરેટિવ અર્બન બેંક છે. એક અખબારી યાદીમાં RBIએ જણાવ્યું હતું કે, નવસર્જન ઈન્ડસ્ટ્રીયલ કો-ઓપરેટિવ બેંકને સાત લાખ, મહેસાણા જિલ્લા પંચાયત એમ્પ્લોઈઝ કો-ઓપરેટિવ બેંકને ત્રણ લાખ અને હાલોલ અર્બન કો-ઓપરેટિવ બેંકને બે લાખ, સ્તંભદ્રી કો-ઓપરેટિવ અર્બન બેંકને પચાસ હજાર  રૂપિયાનો દંડ ફટકારવામાં આવ્યો છે.

RBI અનુસાર, નવસર્જન ઇન્ડસ્ટ્રીયલ કો-ઓપરેટિવ બેંકે ઇન્ટર-બેંક ગ્રોસ અને કાઉન્ટરપાર્ટી એક્સપોઝર મર્યાદાનું ઉલ્લંઘન કર્યું હતું. મહેસાણા જિલ્લા પંચાયત કર્મચારી સહકારી બેંકે પ્રુડેન્શિયલ ઇન્ટર-બેંક કાઉન્ટરપાર્ટી એક્સપોઝર મર્યાદાનું ઉલ્લંઘન કર્યું હતું અને પાત્ર રકમ ડિપોઝિટર એજ્યુકેશન એન્ડ અવેરનેસ ફંડમાં ટ્રાન્સફર ન કરતા દંડ ફટકારવામાં આવ્યો હતો. હાલોલ અર્બન કો-ઓપરેટીવ બેંકે એવી લોન મંજૂર કરી હતી જ્યાં બેંકના એક ડિરેક્ટરના સંબંધી ગેરેન્ટર તરીકે ઉભા હતા.