ઝારખંડની રાજધાની રાંચીમાં પીએમ મોદીની સુરક્ષામાં મોટી ચૂકનો મામલો સામે આવ્યો છે. રાંચીમાં રોડ પરથી પસાર થઈ રહેલા પીએમના કાફલામાં ત્યારે હંગામો મચી ગયો જ્યારે એક મહિલા વાહનની આગળ દોડી આવી હતી. પીએમની કારને અચાનક બ્રેક મારવી પડી. આખો કાફલો અટકી ગયો અને NSG અને અન્ય સુરક્ષાકર્મીઓ એલર્ટ મોડમાં આવી ગયા અને તરત જ પોઝીશન સંભાળી લીધી.

પોલીસે તાત્કાલિક મહિલાને કસ્ટડીમાં લીધી હતી. જોકે પૂછપરછ બાદ તેને બોન્ડ પર છોડી દેવામાં આવી હતી. આ ઘટના બુધવારે ત્યારે સામે આવી જ્યારે પીએમનો કાફલો રાજભવનથી નીકળીને રાંચીના રેડિયમ રોડ થઈને બિરસા મુંડા મેમોરિયલ મ્યુઝિયમ તરફ જઈ રહ્યો હતો.

કાફલામાં વાહનની સામે આવેલી મહિલાની ઓળખ રેડિયમ રોડ રહેવાસી સંગીતા ઝા તરીકે થઈ છે. પોલીસ પૂછપરછમાં જાણવા મળ્યું કે મહિલા તેના પતિથી નારાજ હતી અને આ મામલે પીએમ મોદીને મળવા માંગતી હતી. જ્યારે તેણીને માહિતી મળી કે મોદી રેડિયમ રોડ પરથી પસાર થવાના છે, ત્યારે તે અચાનક દોડીને વાહનની સામે પહોંચી ગઈ.આ ઘટનાનો વીડિયો સોશિયલ મીડિયા પર વાયરલ થયો છે. કહેવામાં આવી રહ્યું છે કે મહિલા માનસિક રીતે પરેશાન છે. તેણીએ તેના પતિ સાથેના વિવાદને લઈને દિલ્હી જઈને પીએમને મળવાનો પ્રયાસ કર્યો હતો. આ સમગ્ર ઘટનાની ઉચ્ચ કક્ષાએ તપાસ કરવામાં આવી રહી છે. જો PMની સુરક્ષામાં કોઈ ક્ષતિ હશે તો તેમને જવાબ માટે બોલાવવામાં આવી શકે છે.