ભરૂચનાં અંકલેશ્વર તાલુકાનાં સંજાલી ગામ પાસે નહેરમાં નહાવા પડેલ 9 વર્ષીય બાળક ડૂબી જતા મોત નીપજ્યું હતું. જોકે ફાયરના જવાનોએ બાળકોના મૃતદેહ નહેર માંથી શોધી કાઢ્યો હતો. બનાવની વિગત એવી છે કે, અંકલેશ્વરનાં સંજાલી ગામના શિવ શક્તિ એપાર્ટમેન્ટમાં રહેતા ક્રિપાલ સિંગ વિજય સીંગનો 9 વર્ષીય પુત્ર રોહિત સિંગ નજીકમાં મહારાજા નગર પાસે આવેલ કેનાલમાં નહાવા ગયો હતો. તે સમયે પાણીના વહેણમાં ડૂબી જતાં સ્થાનિકો એ શોધખોળ શરુ કરી હતી. પરંતુ રોહિતસિંગનો કોઈ પત્તો ન મળતા તાલુકા પોલીસને જાણ કરાતાં પોલીસ કાફલો દોડી આવી પાનોલી જીઆઇડીસી ફાયર સ્ટેશનમાં જાણ કરતા ફાયરના જવાનો આવી પહોંચી કેનાલમાં શોધખોળ કરતા ભારે જહેમત બાદ રોહિત સિંગનો મૃતદેહ મળી આવ્યો હતો. બનાવ અંગે પોલીસે મૃતદેહને પીએમ માટે મોકલી પ્રાથમિક અકસ્માત મોતનો ગુનો નોંધી વધુ તપાસ હાથ ધરી હતી.