દિવાળી પર્વ દરમ્યાન વાપીના ટાંકી ફળિયા વિસ્તારમાં એક યુવકની મોટર સાયકલ પર ફટાકડા ફોડતા 3 ઇસમોને ના પાડતા ત્રણેય ઈસમોએ એક યુવક અને તેના માતા પિતા પર હુમલો કરી માર માર્યો હોવાની ફરિયાદ વાપી ટાઉન પોલીસ મથકમાં નોંધાઈ છે.

ઘટના અંગે મળતી વિગતો મુજબ વાપી ના ટાંકી ફળિયા ગીતા નગર માં રહેતા રમેશ બલરામ કનોજીયા અને તેના માતા પિતા પર આદર્શ ગુપ્તા, અરુણ ગુપ્તા અને હર્ષ ગુપ્તા નામના ત્રણ લોકોએ હુમલો કરી ઢીક્કા મુક્કી નો માર માર્યો હતો. જે અંગે રમેશ બલરામે વાપી ટાઉન પોલીસ મથકમાં ફરિયાદ નોંધાવી હતી કે 24 ઓક્ટોબરે દિવાળી તહેવાર નિમિતે ટાંકી ફળિયા ગીતા નગરમાં ઈશ્વર દેવના તબેલા પાસે તેમની મોટર સાયકલ પાર્ક કરી હતી. જ્યાં આ જ વિસ્તારના અને મનોજસિંગની ચાલમાં રહેતા આદર્શ ગુપ્તા, અરુણ ગુપ્તા અને હર્ષ ગુપ્તા નામના ઈસમો મોટર સાયકલ પર ફટાકડા ફોડતા હોય તેમને રોક્યા હતા.જે ઘટના બાદ ત્રણેય ઈસમોએ રાત્રે 11 થી 12 વાગ્યાની વચ્ચે રમેશ બલરામ ના ઘરે જઈ તેને અને તેના માતાપિતાને ભૂંડી-બિભસ્ત ગાળો ભાંડી ઢીક્કા મુક્કી નો માર માર્યો હતો. જે અંગે ફરિયાદીએ ફરિયાદ નોંધાવતા પોલીસે તપાસ હાથ ધરી છે.