સોનગઢ તાલુકાના સિસોર ગામે આશ્રમ શાળામાં શિક્ષકો અને સ્ટાફને રહેવા સ્ટાફ ક્વાર્ટર્સની વ્યવસ્થા છે. સ્ટાફ ક્વાર્ટર્સ ના કાચા મકાનમાં અચાનક આગ ફાટી નીકળી હતી. ઉપસ્થિત શાળાના સ્ટાફ અને ગ્રામજનોએ પોતાની રીતે આગને બુઝાવવા માટે પ્રયત્ન કર્યો હતો પણ આગનું સ્વરૂપ મોટું હોય આગ કાબુ માં આવી ન હતી.

આખરે શાળાના સ્ટાફ દ્વારા આ આગના બનાવ અંગે વ્યારા પાલિકા, સોનગઢ પાલિકા અને કાકરાપારના ફાયર બ્રિગેડને જાણ કરવામાં આવતાં ફાયરના જવાનો દોડી આવ્યા હતાં. જવાનોએ અંદાજિત બે કલાકથી વધુ સમય સુધી આગ પર પાણીનો મારો ચલાવતાં અંતે આગ પર કાબૂ મેળવી લેવામાં આવ્યો હતો. આ બનાવમાં સ્ટાફ ક્વાર્ટર્સનું મકાન બળીને રાખ થઈ ગયું હતું અને તેની અંદર રાખવામાં આવેલ જૂનું ફર્નિચર અને અન્ય ચીજવસ્તુઓ પણ બળી ગઈ હતી. સદનસીબે કોઈ વ્યક્તિને ઇજા કે નુકસાન થયું ન હતું.