લુધિયાણામાં એક મોટી ઘટનાનાં સમાચાર આવી રહ્યા છે. અહીં ગ્યાસપુરા વિસ્તારમાં ગેસ લીક ​​થવાથી 9 લોકોનાં મોત થયાના અહેવાલ મળી રહ્યા છે. આ ગેસ લીકની ઘટનામાં અત્યાર સુધીમાં 11 લોકો ઘાયલ હોવાનું જાણવા મળી રહ્યું છે. મળતી માહિતી મુજબ, ગેસ ફેક્ટરીમાંથી લીક થયો છે જે બાદ ઘણા લોકો બેહોશ થઈ ગયા હોવાના અહેવાલ છે. આ ફેક્ટરી શેરપુર ચોકડી પાસે સુવા રોડ પર આવેલી છે. આ ગેસ લીકની ઘટના આજે સવારે 7.15 વાગ્યે બની હતી. આ ઘટનાની માહિતી મળતાની સાથે જ પોલીસ અને ફાયર બ્રિગેડની ગાડીઓ પણ ઘટના સ્થળે પહોંચી ગઈ છે અને સમગ્ર વિસ્તારને સીલ કરી દેવામાં આવ્યો છે.

પોલીસે આ વિસ્તારમાં લોકોની અવરજવર અટકાવી દીધી છે અને બચાવ કામગીરીની તૈયારીઓ શરૂ કરી દીધી છે. આ માટે ભટિંડાથી NDRFની ટીમ પણ ગ્યાસપુરા જવા રવાના થઈ ગઈ છે. ઘાયલોને તાત્કાલિક વધુ સારવાર માટે નજીકની હોસ્પિટલ લઈ જવામાં આવી રહ્યા છે. પંજાબના મુખ્યમંત્રી ભગવંત માને પણ લુધિયાણાના ગ્યાસપુરામાં ગેસ લીકની આ ઘટનાની દુઃખદ વ્યક્ત કર્યુ છે. એક ટ્વિટમાં સીએમ માનએ કહ્યું કે, લુધિયાણાના ગ્યાસપુરા વિસ્તારમાં ફેક્ટરીમાંથી ગેસ લીકેજની ઘટના ખૂબ જ દુઃખદ છે. પોલીસ, સરકાર અને NDRFની ટીમો ઘટના સ્થળે હાજર છે. શક્ય તમામ મદદ કરવામાં આવી રહી છે.