Tapi mitra News;કોરાનાની વૈશ્વિક મહામારીના સમયમાં રાજયના કોઇપણ નાગરિકને તકલીફ ના પડે તે માટે  રાજ્ય સરકાર દ્વારા લોકહિતાર્થના અનેકવિધ નિર્ણયો કરવામાં આવ્યા છે. જેના ભાગરૂપે નવસારી જિલ્લા વહિવટી તંત્ર તથા આરોગ્ય વિભાગના માધ્યમ થકી આંગણવાડી વર્કર અને તેડાગર બહેનો  દ્વારા જિલ્લાની સગર્ભા અને ધાત્રી માતાઓ તથા કિશોરીઓનું આરોગ્ય જળવાય તે માટે તેમના ઘરે  ઘરે જઈ બાલશક્તિ, માતૃશક્તિ અને પુર્ણાશકિતના પોષણ આહારની રાશન કિટનું વિતરણ કરવામાં આવી રહ્યું છે. વધુમાં આવા સંકટના સમયે કર્મનિષ્ઠ આંગણવાડી અને આશાવર્કર બહેનો દ્વારા ધાત્રી અને સગર્ભા માતાઓના ઘરે ઘરે જઈને તેમના સ્વાસ્થ્ય અંગેનો સર્વે કરી તેમની પણ ખાસ દરકાર લેવામાં આવી રહી છે.