વલસાડ સીટી પોલીસની ટીમ તારીખ 26 જાન્યુઆરીનાં પર્વને લઈ પોલીસ વિસ્તારમાં કાયદો અને વ્યવસ્થા જળવાઈ રહે તે માટે તેમજ ગેરકાયદેસર પ્રવૃત્તિઓ ઉપર અંકુશ લાવવા પેટ્રોલિંગ કરી રહી હતી. તે દરમિયાન મળેલી બાતમીના આધારે મહારાષ્ટ્રથી પાલનપુર જતી એસ.કે પટેલ ટ્રાવેલ્સની લક્ઝરી બસ નંબર GJ/14/X/9786માં તેનો ચાલક અને ક્લીનર તેમજ બુટલેગરની મિલી ભગતમાં લક્ઝરી બસની ડીકીમાં, પાર્સલની આડમાં દારૂનો જથ્થો લઈ જઈ રહ્યા હોવાની બાતમી વલસાડ સીટી પોલીસના જવાનોને મળી હતી.

જેના મળેલ બાતમીનાં આધારે વલસાડ સીટી પોલીસની ટીમ ધરમપુર ચોકડી પાસે બાતમી વાળી લક્ઝરી બસની વોચ ગોઠવી ઉભી હતી જે દરમિયાન બાતમી વાળી એસ.કે.પટેલની લક્ઝરી બસ આવતા, પોલીસની ટીમે લક્ઝરી બસને અટકાવતા, લક્ઝરીના ચાલકે બસને અટકાવી હતી. પોલીસે બસની ડીકીમાં ચેક કરતા સાત અલગ અલગ બોક્સમાં કુલ 672 બોટલ વિદેશી દારૂનો જથ્થો મળી આવ્યો હતો. પોલીસે દારૂના જથ્થા સાથે બસના ચાલક મહેદીખાન ફતેહખાન બિહારી અને ક્લીનર મોહમ્મદ યાહયા ઇદરિશભાઈ ધોજારીયાની અટકાયત કરી હતી. વલસાડ સીટી પોલીસે રૂપિયા 84,000/-નો વિદેશી દારૂનો જથ્થો, લક્ઝરી બસ તથા 2 નંગ મોબાઇલ મળી કુલ રૂપિયા 10.92 લાખનો મુદ્દામાલ કબજે લઈ દારૂનો જથ્થો ભરાવનાર અને મંગાવનાર ઇસમને વોન્ટેડ જાહેર કરી, સીટી પોલીસ મથકે ગુનો નોંધી આગળની તપાસ હાથ ધરી હતી.