સુરત જિલ્લાનાં માંડવી તાલુકાનાં મોરીઠાથી ઘંટોલી જતાં માર્ગ પર આંટાફેરા મારી રહેલી દીપડી આખરે પાંજરે પુરાઈ હતી. વન વિભાગે દીપડીનો કબ્જે લઈ આગળની તપાસ હાથ ધરી હતી. આ ઉપરાંત માંડવી તાલુકાનાં ખેડપુર ગામમાંથી પણ દીપડાનું બચ્ચું ઝડપાયું હતું. છેલ્લા કેટલાક સમયથી માંડવી તાલુકાનાં મોરીઠા અને ઘંટોલી ગામનાં વિસ્તારમાં દીપડો દેખાતો હતો.

ગ્રામજનોની ફરિયાદ બાદ વન વિભાગ દ્વારા દસ દિવસ અગાઉ પાંજરૂ ગોઠવવામાં આવ્યું હતું. જેમાં શનિવારે મળસ્કે એક દીપડી પાંજરે પુરાઈ હોવાની જાણ થતાં જ ગ્રામજનો ટોળું એકઠું થઈ ગયું હતું. જયારે વન વિભાગની ટીમ પણ સ્થળ પર પહોંચી હતી અને પાંજરા સાથે દીપડીનો કબ્જો લીધો હતો. વન વિભાગનાં જણાવ્યા અનુસાર, આ ચાર વર્ષની દીપડી છે અને હાલ તે સ્વસ્થ છે. વેટરનરી ડોક્ટરની સલાહ બાદ તેને જંગલમાં છોડવાની તજવીજ હાથ ધરવામાં આવશે. વધુમાં કેળકુઈમાં ઘણા સમયથી દીપડાની હાજરીને કારણે ગ્રામજનોની ફરિયાદ બાદ પાંજરું ગોઠવવામાં આવ્યું હતું. જ્યાં આજે દીપડાનું બચ્ચું પિંજરામાં કેદ થયું હતું. વનવિભાગે બચ્ચાનો કબ્જો લઈ આગળની કાર્યવાહી હાથ ધરી હતી.