ગાંધીનગર શહેર નજીક આવેલા વજાપુરા ગામમાં બાઇક લઇને ઘરેથી ડભોડા જવા નિકળેલા યુવાનનું બાઇક ઘર નજીક જ સ્લીપ ખાઇ જતા ગંભીર ઇજાઓ પહોંચી હતી અને તાત્કાલિક સારવાર માટે ગાંધીનગર સિવિલ લઇ જવામાં આવ્યો હતો જ્યાં તેનું મોત નિપજ્યું હતું. બનાવ અંગે ડભોડા પોલીસે અકસ્માતનો ગુનો દાખલ કર્યો છે. મળતી માહિતી મુજબ, વજાપુરા ગામે રહેતા અને ખેતીનો વ્યવસાય કરતા શંકાજી વીસાજી પરમારે ફરિયાદ નોંધાવી હતી કે, ગતરોજ રાત્રે તેમનો 21 વર્ષિય પુત્ર મનીષ ઘરેથી બાઇક લઇને ડભોડા જવાનું કહીને નિકળ્યો હતો.

જોકે ઘરની થોડેક જ દૂર ચોકમાં તેનું બાઇક સ્લીપ ખાઇ ગયું હતું જેના પગલે તેના શરીરે ગંભીર ઇજા પહોંચી હતી આ અકસ્માતને પગલે તાત્કાલિર 108 એમ્બ્લુયન્સને જાણ કરવામાં આવી હતી અને મનીષને સારવાર માટે ગાંધીનગર સિવિલ હોસ્પિટલ લઇ જવામાં આવ્યો હતો જ્યાં તેનું મોત નિપજ્યું હતું. અક્સમાતની આ ઘટના અંગે ડભોડા પોલીસે ગુનો દાખલ કરી તપાસ હાથ ધરી હતી.