પારડી શહેરમાં ચિવલ રોડ સિદ્ધિ વિનાયક સોસાયટીમાં રહેતું પરિવાર ઘર બંધ કરી તીર્થ યાત્રાએ નીકળ્યું અને તસ્કરો ઘર માંથી સોના ચાંદીના દાગીના મળી 1.59 લાખની ચોરી કરી નાસી છુટ્યા હતા.

સુત્રો પાસેથી મળતી માહિતી અનુસાર, પારડી ચિવલ રોડ સિધ્ધિ વિનાયક સોસાયટીમાં બંગલા નંબર-2188/3માં રહેતા હિરેન બાબુભાઈ પટેલ પરિવાર સાથે વીરપુર સાળંગપુર વગેરે સ્થળોએ તીર્થ યાત્રાએ ગત તા.9મી ઓક્ટોબરે ઘર બંધ કરી નીકળ્યા હતા. ત્યારે ઘરને તસ્કરોએ નિશાન બનાવતા દરવાજાનો નકુચો અને તાળું તોડી ઘરમાં ઘૂસી રસોડામાં અનાજ ભરવાની કોઠી અને બેડરૂમમાં લાકડાંના કબાટમાંથી સોના-ચાંદીના દાગીનાની ચોરી કરી તસ્કરો ભાગી છૂટ્યા હતા. જયારે તસ્કરો ઘરમાં રાખેલું સીસીટીવીનું ડીવીઆર પણ ચોરી કરી ગયા હતા. ઘટનાની જાણ થતા તેમના સંબંધી પીનલ નાનુ પટેલને જાણ કરી તેમના ઘરે મોકલ્યા હતા અને આ ચોરીની ઘટના અંગે તેમણે પારડી પોલીસમાં 1.59 લાખની ચોરીની ફરિયાદ નોંધાવી હતી.