ગિરિમથક સાપુતારા સહિત તળેટી વિસ્તારોમાં ગતરોજ બપોરે એકાએક વાતાવરણ બદલાતા વીજળીનાં કડાકા ભડાકા સાથે કમૌસમી વરસાદ તૂટી પડતા સમગ્ર પંથકમાં શીત લહેર વ્યાપી જવા પામી હતી, જ્યારે ખેડૂત આલમ ચિંતા ગ્રસ્ત બન્યો હતો. મળતી માહિતી અનુસાર, ગતરોજ સવારથી જ વાતાવરણમાં ભારે ઉકળાટ અને અસહ્ય ગરમીથી લોકો ત્રાહિમામ પોકારી ઉઠ્યા હતા. જોકે બપોરે ગિરિમથક સાપુતારા સહિત તળેટીનાં માલેગામ, જોગબારી, ગોટીયામાળ, સામગાહન, ભૂરાપાની, છુટા છવાયા વિસ્તારોમાં કમૌસમી વરસાદ તૂટી પડ્યો હતો.

જોકે સતત અડધો કલાક પડેલા માવઠાને પગલે માર્ગો પર પાણી રેલાયા હતા, જેના પગલે ખેતરોમાં ઘઉં, ચણા, કઠોળ, ડુંગળી, સહિત શાકભાજીની ખેતી કરતા ખેડૂતોને નુકશાન થવાની ભીતિ સેવાઇ હતી. કમૌસમી વરસાદને પગલે અસહ્ય ગરમીથી પીડાતા લોકોએ રાહત મેળવી હતી. જોકે ગિરિમથક સાપુતારામાં ઝરમર વરસાદને પગલે વિકેન્ડ માણવા આવેલા સહેલાણીઓને બેવડી ઋતુમાં આનંદ બેવડાયો હતો.