ગુજરાત વિધાનસભા ચૂંટણી 2022 માટે ચૂંટણી તંત્ર સંપૂર્ણ રીતે સજ્જ છે. મતદાર યાદી,ઈવીએમ અને મતદાન મથકનું સંપૂર્ણ આયોજન કરવામાં આવ્યું છે. મતદાન મથક પર મતદારોને સુખદ અનુભવ આપવા માટે ખાસ વ્યવસ્થા કરવામાં આવી છે. એટલું જ નહીં યુવાનો અને વૃદ્ધોને પણ મતદાન માટે પ્રેરિત કરવાના ખાસ પ્રયાસો કરવામાં આવ્યા છે.

ગુજરાતના મુખ્ય ચૂંટણી અધિકારી પી.ભારતીએ જણાવ્યું હતું કે સમગ્ર રાજ્યમાં ચૂંટણી તંત્ર આદર્શ આચારસંહિતાના ચુસ્તપણે પાલન માટે સતર્ક છે. c-VIGIL મોબાઈલ એપ વિકસાવવામાં આવી છે જેથી રાજ્યનો કોઈપણ નાગરિક ગમે ત્યાંથી આદર્શ આચારસંહિતાના ભંગ અંગેની ફરિયાદ ઓનલાઈન નોંધાવી શકે.

મુખ્ય ચૂંટણી અધિકારી પી.ભારતીએ જણાવ્યું હતું કે ગુજરાત વિધાનસભાની ચૂંટણીમાં મતદારોની સંખ્યામાં 7,13,738 નો વધારો થયો છે. જે 1.47 ટકા છે. 10-10-2022 ના રોજ અંતિમ મતદાર યાદી પ્રસિદ્ધ કરવામાં આવી છે. જેમાં કુલ 4,90,89,765 મતદારો નોંધાયેલા છે. જેમાં 2,37,51,738 મહિલા મતદારો અને 2,53,36,610 પુરૂષ મતદારો છે. ગુજરાતમાં 1,417 ટ્રાન્સ જેન્ડર મતદારો છે. ગુજરાતની મતદાર યાદીમાં 80 વર્ષ અને તેથી વધુ વયના 9,87,999 મતદારો નોંધાયેલા છે. ગુજરાતમાં 10,460 મતદારો શતાબ્દી વયના એટલે કે 100 વર્ષ કે તેથી વધુ ઉંમરના છે. જાન્યુઆરીથી સપ્ટેમ્બર 2022 દરમિયાન 18 વર્ષની વય ધરાવતા 3,24,420 યુવા મતદારો પણ મતદાર યાદીમાં નોંધાયેલા છે.

6 જાન્યુઆરીથી 11 ઓગસ્ટ દરમિયાન યોજાયેલા મતદાર યાદી 2022 કાર્યક્રમમાં સતત સુધારણા હેઠળ ગુજરાતમાં 11,36,720 મતદાર ફોટો આઈડી કાર્ડ તૈયાર કરવામાં આવ્યા છે અને સ્પીડ પોસ્ટ દ્વારા પોસ્ટ ઓફિસ દ્વારા મતદારોના ઘરે વિનામૂલ્યે પહોંચાડવામાં આવેલ છે જ્યારે 12 ઓગસ્ટથી 9 ઓક્ટોબર 2022 દરમિયાન યોજાયેલા મતદાર યાદી સંક્ષિપ્ત સુધારણા કાર્યક્રમ હેઠળ 16,51,905 મતદાર ફોટો ઓળખ કાર્ડ તૈયાર કરવામાં આવ્યા છે. ઓળખ કાર્ડ તૈયાર કરીને મતદારોના ઘરે સ્પીડ પોસ્ટ દ્વારા વિનામૂલ્યે પહોંચાડવાની પ્રક્રિયા ચાલી રહી છે.