સુરત જિલ્લાનાં કામરેજ તાલુકાના આંબોલી ગામે તાપી નદી કિનારે તાપી નદીમાંથી એક મહિલા અને એક કિશોરની લાશ મળી આવતા ચકચાર મચી ગઈ હતી. જ્યારે કઠોર નજીક નદીમાંથી 4 થી 5 માસની બાળકીનો મૃતદેહ મળી આવ્યો હતો. પોલીસે ત્રણેય લાશનો કબ્જો મેળવી ઓળખ માટેની તપાસ હાથ ધરી હતી.

સુત્રો પાસેથી મળતી માહિતી અનુસાર, કામરેજ તાલુકાનાં આંબોલી ગામે સાંજના સમયે એક મહિલા અને એક કિશોરની લાશ તણાઇ આવી હતી. સ્થાનિકોએ લાશ જોતાં જ કામરેજ પોલીસને જાણ કરી હતી. પોલીસે બંનેની લાશનો કબ્જો લઈ પોસ્ટમોર્ટમની કાર્યવાહી હાથ ધરી હતી. મહિલાની ઉંમર આશરે 40 વર્ષ અને કિશોરની ઉંમર આશરે 13 વર્ષ હોવાનું પોલીસે જણાવ્યુ હતું. બંનેની ઓળખ હજી સુધી થઈ હકી નથી. ડીકમ્પોઝ હાલતમાં મળેલી બે લાશો પૈકી મહિલાએ લીલા રંગનો પંજાબી ડ્રેસ પહેરેલ છે તેમજ કિશોર લાંબી બાયની ટીશર્ટ અને જીન્સ પેન્ટ પહેરેલ છે. ટી શર્ટ USK લખેલું છે. બીજી તરફ કઠોર ગામે નદીમાંથી 4 થી 5 માસની બાળકીનો મૃતદેહ મળી આવ્યો હતો. પોલીસે મૃતકના વાલીવારસની શોધખોળ શરૂ કરી આગળની તપાસ હાથ ધરી હતી.