સુરત જિલ્લાના બારડોલી તાલુકાનાં મોવાછી ગામે પરોણા ફળિયામાં રહેતા અને એકલવાયુ જીવન જીવતા આધેડની નહેરમાં ભૂંગરાની વચ્ચેથી લાશ મળી આવી હતી.

સુત્રો પાસેથી મળતી માહિતી મુજબ, મોવાછી ગામે પરોણા ફળિયામાં રહેતા સૂખાભાઈ કીકાભાઈ હળપતિ (ઉ.વર્ષ 55) એકલવાયું જીવન જીવતા હતા અને છૂટક મજૂરી કરી પોતાનું જીવન ગુજારતા હતા. છેલ્લા ચાર પાંચ દિવસથી તે ક્યાંક જતાં રહ્યા હતા. ત્યારબાદ બુધવારે સાંજે ગામના કેટલાક યુવાનો પરોણા ફળિયા પાછળ આવેલ હસમુખભાઈ કેશવભાઈ પ્રજાપતિના શેરડીના ખેતર પાસે નહેરમાં માછલી પકડવા ગયા હતા. ત્યારે નહેરના ભૂંગળામાં કોઈકની લાશ દેખાઈ હતી. આ ઘટના અંગે પોલીસને જાણ થતાં પોલીસ સ્થળ પર પહોંચી હતી અને લાશ બહાર કાઢતા એ લાશ સૂખાભાઈ કીકાભાઈ હળપતિની હોવાનું બહાર આવ્યું હતું. આધેડએ કોઈક અગમ્ય કારણોસર નહેરમાં ડૂબી જવાથી તેનું મોત થતાં પોલીસે અકસ્માત મોતનો ગુનો નોંધી આગળની તપાસ હાથ ધરી હતી.