પંચમહાલ જિલ્લાના હાલોલ રૂરલ પોલીસ સ્ટેશનમાં નોંધાયેલા એક ગુનામાં એક શખ્સને વોન્ટેડ જાહેર કર્યો હતો. ત્યારબાદમાં તેને હાજર કરી મારઝૂડ અને હેરાનગતિ નહીં કરવા માટે રૂ.૨.૫૦ લાખની લાંચની માંગણી કેસની તપાસ કરતાં હાલોલ ગ્રામ્ય પોલીસ મથકના પ્રો.પી.એસ.આઈ. મેહુલ રમેશભાઈ ભરવાડે કરી હતી. દરમિયાન ગુનાના આરોપીએ રૂ.૧ લાખની સગવડ થઈ હોવાનુ જણાવતા પી.એસ.આઈ. મેહુલ ભરવાડે સારુ કહી એક લાખ રૂપિયા લઈને આવવા જણાવ્યું હતું.

ત્યારબાદ નવી નવી નિમણૂંક થયેલા લાંચિયા પી.એસ.આઈ.ને પાઠ ભણાવવા માટે પંચમહાલ એસીબીનો સંપર્ક કરી ફરિયાદ આપી હતી. લાંચની ફરિયાદના આધારે મદદનીશ નિયામક બી.એમ.પટેલના માર્ગદર્શન હેઠળ પી.આઈ.આર.બી. પ્રજાપતિએ સ્ટાફ સાથે પોલીસ સ્ટેશનમાં લાંચનું છટકું ગોઠવ્યું હતું. ગુન્હાના કામે તેમજ લાંચની રકમ માટે હેતુલક્ષી વાતચીત કર્યા બાદ પીએસઆઈ મેહુલ ભરવાડે લાંચની રકમ રૂ.૧ લાખ સ્વીકારતાં જ એસીબીની ટીમે લાંચની રકમ સાથે પીએસઆઈને રંગે હાથ ઝડપી પાડયો હતો.