આણંદનાં પેટલાદના ગોલવાડ વિસ્તારમાં પેટલાદ શહેર પોલીસે છાપો મારી જુગાર રમી રહેલા ચાર જુગારીઓને ઝડપી પાડયા હતા, જ્યારે બે જુગારીઓ ફરાર થઈ જવામાં સફળ રહ્યા હતા. મળતી માહિતી મુજબ, પેટલાદના ગોલવાડ વિસ્તારમાં કેટલાક ઈસમો એકત્ર થઈ પત્તાપાનાનો જુગાર રમી રહ્યા હોવાની બાતમી પોલીસને મળી હતી. જેના આધારે પોલીસે રાત્રે ગોલવાડ વિસ્તારમાં ઓચિંતો છાપો માર્યો હતો. ત્યારે સ્ટ્રીટલાઈટના અજવાળે જુગાર રમી રહેલા જુગારીઓમાં નાસભાગ મચી હતી. જોકે પોલીસે કોર્ડન કરીને વિજયભાઈ ગોવિંદભાઈ રાણા, મનીષભાઈ શાંતિલાલ રાણા, નવીનભાઈ વિષ્ણુભાઈ રાણા અને વિરલ અરવિંદભાઈ રાણાને પકડી પાડયા હતા. જ્યારે અજય મહેશભાઈ રાણા અને ભાવિન યોગેશભાઈ રાણા નાસી છૂટયા હતા. પોલીસે ઝડપાયેલા શખ્શોની અંગજડતી અને દાવ પરથી મળી રોકડા રૂપિયા કબ્જે કરી ગુનો નોંધી કાયદેસરની કાર્યવાહી હાથ ધરી હતી.