બારડોલીના બાબેન ગામની શબરીધામ સોસાયટીમાં રહેતું દંપતી લોન ભરવામાં નિષ્ફળ જતા બેંકે મકાન કબજે કરી સીલ માર્યુ હતું. બેંકે આ મકાન સુરતની ફાઈનાન્સ કંપનીને સોંપી દીધું હતું. દંપતી આ સીલ તોડી મકાન પર ફરી કબજો જમાવી રહેવા લાગ્યું હતું. જેથી ફાઈનાન્સ કંપનીએ બારડોલી ટાઉન પોલીસ મથકે દંપતી વિરુદ્ધ ફરિયાદ નોંધાવી હતી.

મળતી માહિતી મુજબ, બારડોલીના બાબેન ગામની શબરીધામ સોસાયટીમાં મકાન નં.બી/૨૫૦માં કિશોર મગનલાલા જાધવ અને તેની પત્ની વિદ્યા રહેતા હતા. તેમણે બેંક પાસેને મકાન મોર્ગેજ મૂકી લોન લીધી હતી. તેમણે લોન ન ભરતા બેંકે તેમનું મકાન કબજે કરીને સીલ કર્યુ હતું. બેંકે વેચાણથી ચોલા મંડલમ ઇનવેસ્ટમેન્ટ ફાઈનાન્સ કંપની લિ. (૭ ફ્લોર જૂનું મોન્ટેના ટાવર આર.ટી.ઓ. ઓફિસ સામે, પાલ રોડ, સુરત) મકાનનો કબજો આપ્યો હતો. જાદવ દંપતી આ મકાનનું સીલ તોડી નાંખી આ મકાન પર ફરી કબજો જમાવી રહેવા લાગ્યું હતું. ફાઈનાન્સ કંપનીના બ્રાંચ લીગલ મેનેજરએ પોલીસ ફરિયાદ નોંધવતા બારડોલી ટાઉન પોલીસ મથકે જાદવ દંપતી વિરુદ્ધ ફોજદારી ગુનો નોંધાયો હતો.