ધૂળેટીના દિવસે સુરતના સચિન વિસ્તારમાં આરોપીઓએ રીતસરનો આતંક મચાવ્યો હતો. સચિનના સેજલનગરમાં રીક્ષામાં આવેલા લોકોએ 4થી 5 લોકો પર ચપ્પા વડે હુમલો કર્યો હતો. ત્યારબાદ પૂરપાટ ઝડપે રીક્ષા હંકારી ભાગવાનો પ્રયાસ કર્યો હતો. સમગ્ર ઘટનાનો વીડિયો સોશિયલ મીડિયામાં વાઈરલ થયો હતો. આ મામલે પોલીસે ચાર અસામાજિક તત્ત્વોની ધરપકડ કરીને સરઘસ કાઢવામાં આવ્યું હતું.

અમદાવાદના વસ્ત્રાલમાં અસામાજિક તત્ત્વોના આતંક બાદ હવે સુરતના સચિન વિસ્તારમાં અસામાજિક તત્ત્વોએ ચપ્પા વડે 4થી 5 લોકો પર હુમલો કરાયો હોવાની ઘટનાનો વીડિયો વાઈરલ થયો હતો. સચિનના સેજલનગર વિસ્તારમાં રીક્ષામાં આવેલા કેટલાક ઈસમોએ રીતસરનો ભયનો માહોલ પેદા કર્યો હતો. સ્થાનિક રહીશો પર છરી વડે હુમલો કરી ભાગવાનો પ્રયાસ કરતાં સ્થાનિક રહીશો પોતાના બચાવ માટે પથ્થરમારો શરૂ કર્યો હતો. સમગ્ર ઘટના કેમેરામાં કેદ થઈ હતી. સમગ્ર ઘટનાને લઈને પોલીસે વીડિયોના આધારે વધુ તપાસ હાથ ધરી હતી. જ્યારે પોલીસે ચાર આરોપીની ધરપકડ કરીને આગળની કાર્યવાહી હાથ ધરી છે.