આણંદના તારાપુર વાસદ રોડ ઉપર પેટલાદના ધર્મજ ઓવરબ્રિજ ઉપર બનેલી હીટ એન્ડ રનની ઘટનામાં વાહનની ટક્કરે ગંભીર રીતે ઘવાયેલા બાઈક ચાલકનું સારવાર દરમિયાન કરુણ મોત નીપજ્યું હતું. આ બનાવ અંગે પેટલાદ ગ્રામ્ય પોલીસે અકસ્માત સર્જનાર વાહનના ચાલક વિરુદ્ધ ગુનો નોંધી વધુ તપાસ હાથ ધરી છે.

વડોદરાના મકરપુરા વિસ્તારમાં રહેતા ભાનુભાઈ સોલંકી સવારે મોટરસાયકલ લઈને પોતાના વતન સોજીત્રા તાલુકાના ગાડા ગામે આવેલા મહાકાળી માતાના મંદિરે દર્શન કરવા માટે આવવા નીકળ્યા હતા. દરમિયાન મોટરસાયકલ તારાપુર વાસદ રોડ ઉપર આવેલા ધર્મજ ગામના ઓવરબ્રિજ ઉપરથી પસાર થઈ રહી હતી. ત્યારે પાછળથી પુરપાટ ઝડપે આવી ચડેલી ગાડીના ચાલકે તેઓની મોટરસાયકલને ટક્કર મારતા ભાનુભાઈ સોલંકી રોડ પર પટકાયા હતા. અકસ્માત બાદ અજાણ્યો વાહન ચાલક ઘટના સ્થળેથી ફરાર થઈ ગયો હતો. ગંભીર રીતે ગવાયેલ ભાનુભાઈને તુરંત જ સારવાર અર્થે પેટલાદની હોસ્પિટલમાં ખસેડવામાં આવ્યા હતા. જ્યાંથી તેઓને વધુ સારવાર અર્થે વડોદરાની હોસ્પિટલમાં લઇ જતા ત્યાં સારવાર દરમિયાન તેઓનું મોત નીપજ્યું હતું.