સુરત જિલ્લાનાં કોસંબા નજીક ધામરોડ ગામની સીમમાં નેશનલ હાઈવે પર પાંચ વાહનો વચ્ચે વિચીત્ર અકસ્માતની ઘટનાનાં પગલે ટ્રાફિકજામ થઇ હાઇવે પર અફરાતફરીનો માહોલ સર્જાયો હતો. સુત્રો પાસેથી મળતી માહિતી મુજબ, કોસંબા પોલીસની હદમાં ધામરોડ ગામની સીમમાં અમદાવાદ-મુંબઇ નેશનલ હાઈવે પરનાં ટ્રેક પર અમદાવાદ તરફ જઈ રહેલુ ડમ્પરે કારોને અડફેટમાં લીધી હતી. જોકે તે બે કાર અન્ય એક કાર અને ટેન્કર સાથે ભટકાઈ હતી.

આમ કુલ પાંચ વાહનો એકબીજા સાથે અથડાતા નેશનલ હાઈવે નંબર-૪૮ પર અમદાવાદ-મુંબઈ ટ્રેક પર નાસભાગ મચી ગઈ હતી. ત્રણ કારો પૈકી બે કાર ડિવાઈડર ઉપર ચઢી જતા અમદાવાથી મુંબઈ તરફ જવાનો ટ્રેક ઉપર એક કિ.મી.થી વધુ વાહનોનો ખડકલો થઈ જતા ટ્રાફિક જામની સ્થિતી વચ્ચે હાઈવે પર અફરાતફરીનો માહોલ સર્જાયો હતો. જોકે સમગ્ર વિચીત્ર અકસ્માતની જાણ થતા જીલ્લા ટ્રાફિક પી.એસ.આઈ. પોતાની ટીમ સાથે બનાવનાં સ્થળે દોડી ગયા હતા અને ક્રેન બોલાવી કલાકોની જહેમતનાં અંતે તમામ વાહનોને રોડ સાઇડ કરી એક કલાકથી વધુ ટ્રાફિક જામ સ્થિતિને હળવી કરી હતી. નેશનલ હાઈવે પર બનેલી ઉપરોક્ત અકસ્માતનાં બનાવમાં હાઇવે ઓથોરીટી અને સ્થાનિક પોલીસ નહીં ફરકતા ખાસ કરીને વાહન ચાલકોમાં રોષની લાગણી જોવા મળી હતી. સદનસીબે કોઈ જાનહાની થઈ ન હતી.