ગારીયાધારના પચ્છેગામનો ઉપસરપંચ રૂ.૯૬ હજારની લાંચ લેતા ભાવનગર એસીબીના હાથે પકડાયો છે.જેને લઇ લાંચિયા સરપંચોમાં ફફડાટ પ્રસરી જવા પામ્યો છે.

મળતી માહિતી મુજબ ભાવનગર જિલ્લાના ગારીયાધાર તાલુકાના પચ્છેગામ ગ્રામ પંચાયતની હદમાં PMKSY IWMP-25 રૂપાવટી પ્રોજેકટ યોજના હેઠળ વોટરશેડના કામો ઇ-ટેન્ડર દ્રારા કુલ રૂા.૧૫,૪૪,૦૦૦/- ના કામનો વર્ક ઓર્ડર મળેલ  હોય, જે કામોમા ફરીયાદીને પચ્છેગામના ઉપસરપંચએ જણાવેલ કે,ગ્રામ પંચાયતના સરપંચ તથા સભ્યો મારા કહ્યા મુજબ કામ કરે છે અને જો તમે મારા કહયા મુજબ નહી કરો તો તમારા કામોમા ગેરરીતી થાય છે તેમજ વ્યસ્થિત રીતે કામ થતુ નથી તેવા ખોટા વાંધાઓ ઉભા કરી તમારા વિરૂધ્ધ ઠરાવ પસાર કરાવી તમારુ કામ બંધ કરાવી દઇશ અને જો તમારે આ પચ્છેગામના સીમાડામાં કામ કરવુ હોય તો તમારે કામના બદલામાં રૂા.૩,૦૦,૦૦૦/- લાંચ પેટે આપવા પડશે તે રીતે લાંચની રકમની માંગણી કરી હતી.

જોકે અગાઉ રૂા.૭૫,૦૦૦/- લાંચ પેટે મેળવી લીધા હતા. ત્યારબાદ બાકીની લાંચની રકમની માંગણી ફરીયાદી પાસે અવાર નવાર કરતા હોય.જેથી ફરીયાદી લાંચની રકમ આપવા માંગતા ન હોય એ.સી.બી નો સંપર્ક કરતા આજરોજ તાલુકા સેવા સદનની સામે આવેલ દાતાર આઇસ્ક્રીમ એન્ડ ફાસ્ટફ્રુડ પાસે લાંચના છટકાનું આયોજન કરતા આરોપી ઉપસરપંચ ખીમજીભાઇ કાળુભાઇ વાળાએ ફરીયાદી સાથે હેતુલક્ષી વાતચીત કરી  લાંચની રકમ રૂ.૯૬,૦૦૦/- સ્વીકારતા ભાવનગર એસીબીના હાથે પકડાઈ ગયો હતો.