કર્ણાટકની રાજધાની બેંગલુરૂનાં વીરભદ્રનગર વિસ્તારમાં એક બસ ડેપોમાં આગ લાગવાની ઘટના સામે આવી છે. શહેરના વીરભદ્રનગર વિસ્તારમાં પ્રાઈવેટ બસોમાં લાગેલી આગનો વીડિયો પણ સામે આવ્યો છે, જેમાં ભયંકર આગના કારણે આકાશમાં કાળા ડીબાંગ ધુમાળા જોવા મળી રહ્યા છે અને 5થી 10 બસો આગમાં રાખ થઈ ગઈ છે. સૂચનાની જાણ થતાં જ ફાયર બ્રિગેડ સ્ટાફ પહોંચી ગયો છે અને આગ પર કાબુ મેળવવાની કામગીરી પુરજોશમાં શરૂ કરી દીધી છે. આગના ધૂમાળાના ગોટેગોટા આકાશમાં જોવા મળતા આસપાસના વિસ્તારોમાં પણ ભારે અફરાતફરીના માહોલ સર્જાયો હતો.

બસ ડેપોમાં ઉભેલ આ બસો ખાલી હોવાથી મોટી જાનહાની ટળી છે. એશિયાનેટના અહેવાલો મુજબ આગના લાગવાની માહિતી મળતા જ ફાયર બ્રિગેડની ટીમ તુરંત પહોંચી ગઈ છે. ફાયર બ્રિગેડના 2 વાહનો હાલ આગ પર કાબુ મેળવવાનો પ્રયાસ કરી રહ્યા છે. બેંગલુરૂમાં છેલ્લા ઘણા સમયથી આગ લાગવાની ઘટનાઓ સામે આવી ચુકી છે. તાજેતરમાં જ એક કેફેમાં અને એક ફટાકડાના ગોડાઉનમાં આગ લાગી હતી. ત્યારબાદ આજે બસ ડેપોમાં આગ લાગી ગઈ છે. આગ લાગવાનું કારણ હજુ સામે આવ્યું નથી. જોકે ડેપોના અધિકારીઓ અને પોલીસ ઘટનાની તપાસ કરી રહ્યા છે. જોકે હજુ સુધી આગ લાગવાના કારણો સામે આવ્યા નથી. તેમજ ડેપો નજીક એક ગેરેજથી આગ શરૂ થઈ હોવાની સંભાવના વ્યક્ત કરાઈ છે. હાલ સ્થિતિ કાબુમાં છે અને અધિકારીઓ આગ લાગવાના કારણોની તપાસ કરી રહ્યા છે. ઉપરાંત આગના કારણે કેટલું નુકસાન થયું તેનું પણ આંકલન ચાલી રહ્યું છે.