શૈલેષ પ્રજાપતિ-તાપીમિત્ર ન્યુઝ,સુરત:માંડવી વનવિભાગે શનિવારની રાત્રી દરમ્યાન બાતમીના આધારે એક સાગી લાકડા ભરેલ પિકઅપવાનને ઝડપી પાડી હતી.વાનમાં તપાસ કરતાં અંદરથી 30 નંગ સાગી લાકડાના ચોરસા મળી આવ્યા હતા.વનવિભાગે સગી લાકડા સહિત પિકઅપવાન મળી કુલ 3.35 લાખનો મુદ્દામાલ કબ્જે કર્યો હતો.જ્યારે પિકઅપવાન ચાલક ફરાર થઈ ગયો છે. સુરત જિલ્લાના માંડવી વનવિભાગના આર.એફ.ઓ વિક્રમસિંહ સુરમાં,રાઉન્ડ ફોરેસ્ટર અનિલ પટેલ,ઉપેન્દ્ર રાઉલજી સહિત સ્ટાફ માંડવી જંગલ વિસ્તારમાં રાઉન્ડમાં નીકળ્યો હતો.તે સમય દરમ્યાન બાતમી મળી હતી કે એક પિકઅપવાનમાં સાગી લાકડા ભરી ફેદરિયા ચાર રસ્તા નજીકથી પસાર થવાની છે જે બાતમીના આધારે માંડવી વનવિભાગે ફેદરિયા ચાર રસ્તા તેમજ રૂપણ ગામ નજીક વોચ ગોઠવી ઊભા હતા.તે દરમ્યાન બાતમી મુજબની પિકઅપવાન નંબર GJ-7-UU-2730 આવતા તેને અટકાવવાની કોશિશ કરતાં પિકઅપવાન ચાલકે પૂરઝડપે હંકારી ભાગી છૂટતા વનવિભાગે તેનો ફિલ્મી ઢબે પીછો કરતાં પિકઅપવાન ચાલક માંડવીના અંધાત્રી ગામની સીમમાં નહેરના કાંટા પાસે પિકઅપવાન મૂકી શેરડીના ખેતરમાં ભાગી છૂટ્યો હતો.વનવિભાગની ટીમે પિકઅપ વાનમાં તપાસ કરતાં 30 નંગ સાગી લાકડાના ચોરસા મળી આવ્યા હતા જેની કિંમત રૂ. 2.10 લાખ તેમજ પિકઅપ વાનની કિંમત રૂપિયા 1.25 લાખ મળી કુલ્લે રૂ.3.35 લાખનો મુદ્દામાલ વનવિભાગે કબ્જે કરી આગળની કાર્યવાહી હાથ ધરી છે.