તાપીમિત્ર ન્યુઝ,સુરત:તક્ષશિલા અગ્નિકાંડ બાદ ફાયર સેફ્ટીને લઈને લાપરવાહી દાખવતાં દુકાનદારો અને કોમર્શિયલ કોમ્પલેક્ષ્,સ્કૂલ- ટ્યુશન ક્લાસીસ સહિતની ઈમારતો સામે ફાયરબ્રિગેડ દ્વારા લાલ આંખ કરવામાં આવી છે. ફાયર બ્રિગેડ દ્વારા ફાયર સેફ્ટીના મુદ્દે નોટિસો આપવા છતાં ફાયર સેફ્ટીના સાધનો ન વસાવનારની દુકાનો અને કારખાના સીલ કરવાની કામગીરી ફાયરબ્રિગેડ દ્વારા કરવામાં આવી રહી છે. રામપુરા વિસ્તારમાં આવેલા ડેવલોપ ટ્યુશન ક્લાસીસ, સ્કૂલ સહિત સોશિયો સર્કલ પાસે આવેલા ઓર્લિનસ કોમર્શિયલ કોમ્પલેક્ષને સીલ કરવામાં આવ્યાં છે. સોસિયો સર્કલ વિસ્તારમાં આવેલા ઓર્લિનસ કોમર્શિયલ કોમ્પલેક્ષને સીલ કરી દેવામાં આવ્યું હતું. ફાયર સેફ્ટીના અભાવે પ્રતિભા આદર્શ ઈંગ્લિશ સ્કૂલ તથા પીપલ્સ એજ્યુકેશન સ્કૂલને સીલ કરી દેવામાં આવી હતી. રામપુરા વિસ્તારમાં આવેલા ડેવલોપ ટ્યુશન ક્લાસીસને સીલ કરી દેવામાં આવ્યું હતું. ફાયર સેફ્ટી લગાવ્યા બાદ જ આ સીલ ખોલવામાં આવશે તેમ ફાયર બ્રિગેડ દ્વારા જણાવવામાં આવ્યું હતું. તક્ષશિલા અગ્નિકાંડ બાદ પોલીસ કમિશનરે જાહેરનામું બહાર પાડીને દરેક ક્લાસીસને ફાયરનું એનઓસી લેવા ફરજીયાત કરી દેવામાં આવ્યું હતું ત્યારે સવાલો ઉભા થઈ રહ્યા છે કે, એનઓસી લીધા વગર જ રામપુરામાં આવેલું ડેવલોપ ટ્યુશન ક્લાસીસ કેવી રીતે ચાલતું હતું. પાલિકાના ફાયર બ્રિગેડ દ્વારા આ અગાઉ પણ સ્પેશિયલ ડ્રાઈવ યોજીને ક્લાસીસ વિરૂધ્ધ કાર્યવાહી કરવામાં આવી હતી.