તાપીમિત્ર ન્યુઝ,વ્યારા:ખેલ મહાકુંભ-૨૦૧૯ ની ટેકવાન ડો કરાટે સ્પર્ધામાં ડોલવણ અને વાલોડ તાલુકાની સરહદે આવેલા કલકવા-ગોડધા ગામની બે બહેનો નિલેશ્વરી કિરણભાઈ ચૌધરી અને હિરલ કિરણભાઈ ચૌધરીએ જિલ્લા કક્ષાની સ્પર્ધામાં પ્રથમ નંબર મેળવી ગામ તેમજ જિલ્લાનું ગૌરવ વધાર્યું છે.ગ્રામીણ ક્ષેત્ર સહિત ખેલાડીઓમાં છુપાયેલ રમત કૌશલ્યને બહાર લાવવા રાજ્ય સરકાર દ્વારા પ્રતિવર્ષ ખેલ મહાકુંભનું આયોજન કરવામાં આવે છે.તાપી જિલ્લામાં ટેકવોન ડુ કરાટે સ્પર્ધા તા.૬/૯/૨૦૧૯ ના રોજ નગરપાલિકા રમત ગમત સંકુલ-વ્યારા ખાતે યોજાઈ હતી.જેમાં ઓપન કેટેગરીમાં ભાઈઓ અને બહેનો મળીને કુલ ૧૦૦ ખેલાડીઓએ ભાગ લીધો હતો.સ્વરક્ષણ કરાટેની આ સ્પર્ધામાં ખૂબ જ ઉત્સાહથી સૌ ખેલાડીઓએ ભાગ લઇ પોતાની ખેલકલા પ્રદર્શિત કરી હતી.કરાટેની આ સ્પર્ધામાં બંને બહેનો નિલેશ્વરી અને હિરલે પોતાનું ખેલ કૌશલ્ય બતાવી જિલ્લામાં પ્રથમ નંબરે આવી ગૌરવ અપાવ્યું છે. નિલેશ્વરી હાલ ફિઝિયોથેરાપીસ્ટ ની ડિગ્રી મેળવી હાલ માસ્ટર ડીગ્રીમાં અભ્યાસ કરે છે જ્યારે હિરલ ડીગ્રી એન્જીનીયરીંગમાં અભ્યાસ કરે છે.બંને બહેનો ઉકાતરસાડિયા યુનિવર્સીટી, માલીબા કોલેજ માં અભ્યાસ કરે છે.આ બંને બહેનો કોચ પિતા કિરણભાઈ ટી.ચૌધરી ના માર્ગદર્શન હેઠળ તૈયારી કરી રાજ્ય કક્ષાએ ભાગ લેવા જશે.જિલ્લા રમત-ગમત કચેરી અને જિલ્લાના વહીવટી તંત્રે ભાગ લેનારા સૌ ખેલાડીઓને શુભકામના પાઠવી વિજેતાને અભિનંદન આપ્યા હતા.