વલસાડના પારડી એક્સેલ કંપનીના કામદારો માટે ટુકવાડા ગ્રાઉન્ડ ખાતે સ્પોર્ટ્સ ડેનું આયોજન કરવામાં આવ્યું હતું. જેમાં ક્રિકેટ મેચમાં રમવા માટે પારડી નવી મામલતદાર કચેરી પાછળ ભાડાના રૂમમાં રહેતો સુરેશ રાજબહાદુર વર્મા (ઉ.વ.૧૯) અને વત્સલ છીબુભાઈ પટેલ (રહે.પંચલાઈ) તેમજ સંતકુમાર નથ્થુભાઈ વર્મા એક્ટિવા મોપેડ નંબર જીજે/૧૫/બીઆર/૭૯૬૭ પર સવાર થઈ નીકળ્યા હતા. આ દરમિયાન પરિયા વેલવાગડ રોડ પર મોપેડ આગળ ચાલતાં વાહનમાં અથડાતા ત્રણેય મિત્રો માર્ગ પર પટકાયા હતા. જેમાં સુરેશને માથામાં ગંભીર ઈજા પહોંચતા તેનુ ઘટના સ્થળે જ કરૂણ મોત નીપજ્યું હતું.