ઉમરગામ તાલુકામાં અવિરત વરસાદને કારણે જળબંબાકારની સ્થિતિ સર્જાઈ છે. જોકે સોલસુંબાં પૂર્વ વિસ્તારની સોસાયટીઓમાં પાણી ભરાતા દુકાનદારો અને રહીશો મુશ્કેલીમાં મુકાયા હતા. જયારે ગુજરાતને મહારાષ્ટ્ર સાથે જોડતા ઝરી કોઝવે ઉપર પાણી ફરી વળતા વાહનોની અવરજવર પર રોક લગાવાઇ હતી.

તેમજ સુરક્ષાને ધ્યાને લઈ પોલીસ બંદોબસ્ત ગોઠવી દેવાયો હતો અને દહેરી પંચાયત કોસ્ટેલ હાઇવે પાસે તળાવ ઓવરફ્લો થતાં પંચાયતે પાણીના નિકાલ માટે કામ શરૂ કર્યું હતું. વધુમાં કાંઠા વિસ્તારનાં 14 ગામોને જોડતા કોસ્ટલ હાઇવે પર ઉમરગામ અને દહેરી વચ્ચે વરસાદી પાણી ફરી વળ્યા હતા.