પ્રેમ પ્રકરણમાં પારડી ફાઉન્ટન હોટલમાં બે જૂથ વચ્ચે મારામારી થતા દોડદામ મચી ગઇ હતી. જયારે બનાવમાં 3 લોકો ઘાયલ થતા પારડીની હોસ્પિટલમાં દાખલ કરાયા હતા. જોકે આ સમગ્ર ઘટના સીસી ટીવી કેમેરામાં કેદ થઇ ગઇ હતી. બનાવની વિગત એવી છે કે, પારડીમાં સ્વાધ્યાય મંડળ રોડ મારુતિ સોસાયટીમાં સિલ્વર પેલેસમાં રહેતા અને વલસાડી ઝાપા ખાતે પાનનો ગલ્લો ચલાવતા શાહેઆલમ શમી ખાન પઠાણનો વલસાડ ખેરગામની પરિણીતા સાથે પ્રેમ સંબંધ ચાલતો હોય જેની બાબતની જાણ તેના પતિ તેમજ તેના પિતરાઇ ભાઇને થતાં શાહે આલમને પરિણીતા સાથે પ્રેમસંબંધ નહીં રાખવા માટે સમજાવ્યો હતો.

ત્યારબાદ પ્રેમ સંબંધ ચાલુ રાખ્યો હતો અને આ બાબતની અદાવતમાં બુધવાર રાત્રીએ પારડી ફાઉન્ટન હોટલ આગળ શાહેઆલમ તેના મિત્ર વિકાસ ભૈયા, ફૈઝાન ઉર્ફે નાગેન પઠાણ અને લાલ કલરની ટીશર્ટ વાળો એક અન્ય લોકો તેમજ સામે પક્ષના મોહમદ ઝેદ અયુબ શેખ (રહે.વલસાડ, મોતીવાડી પોલીસ હેડ કવાટર્સ), શાહીલ ઉર્ફે બંટી વિજયભાઈ કોરી (રહે.જશ્નબાગ, વલસાડ) અને અસલમ (રહે.અતુલ) નાઓ ભેગા થયા હતા અને શાહેઆલમ અને વલસાડની યુવતીના પ્રેમ સંબંધમાં શું કામ પડે છે જેવા મુદ્દે આ બે જૂથો વચ્ચે વાતચીત શરૂ થઈ હતી અને વાત આગળ વધતા બંને જૂથો સામસામે આવી ગયા હતા અને હોટલ પરિસરમાં શરૂ થયેલી મારામારી હોટલનાં એસી હોલમાં પહોંચી ગઈ હતી.

જ્યાં લાકડી અને લોખંડના સળીયા વડે મારામારી થતા હોટલમાં બેસેલા ગ્રાહકોમાં અને સ્ટાફમાં દોડધામ મચી જવા પામી હતી. બનાવ અંગેની જાણ પોલીસને થતા પારડી પોલીસ ઘટના સ્થળે પહોંચી હતી અને આ મામલે બંને જૂથોએ સામસામે ફરિયાદ નોંધાવી હતી. જયારે આ મારામારીમાં શાહે આલમ, મોહમદ ઝેદ તેમજ શાહીલ ઉર્ફે બંટી આમ ત્રણેય લોકો ઘાયલ થતા પારડીની કુરેશી હોસ્પિટલમાં સારવાર માટે દાખલ કરાયા હતા. આ સમગ્ર મારામારીની ઘટના સીસીટીવી કેમેરામાં કેદ થતા પોલીસે સીસીટીવી ફૂટેજ મેળવી વધુ કાર્યવાહી હાથ ધરી હતી.