વડોદરા શહેરના ગોરવા તેમજ ગોત્રી વિસ્તારમાં થયેલી પાંચ ચોરીનાં ગુનાનો ભેદ ઉકેલી પીસીબીએ સિકલીગર ગેંગના ચાર ઈસમોને ઝડપી પાડયા હતા. સુત્રો પાસેથી મળતી માહિતી મુજબ, ડભોઇ રોડ પર આવેલી જલારામ નગર વસાહતમાં રહેતો જોહરસીગ દિલીપસીંગ બાવરી પોતાના માણસો સાથે ફોર વ્હીલ ગાડીમાં નીકળી શહેરના કેટલાંક સ્થળોએ ચોરીઓ કરે છે.

જોકે પોલીસે જે સ્થળે ચોરી થઇ હતી તે વિસ્તારનાં સીસીટીવી ફુટેજ ચકાસતા મારુતી એસએક્સ કારની હાજરી મળી હતી. પોલીસે કારનો નંબર ચેક કરાવતા તે કાર જોહરસીંગની માલિકીની જણાઇ હતી. ત્યારબાદ પોલીસે જોહરસીંગ ઉપરાંત તેના ભાઇ મહેન્દ્રસીંગ, અમરસીંગ ઉર્ફે પાપી લોહરસીંગ બાવરી અને બલજીતસીંગ ઉર્ફે બલ્લી લોહરસીંગ બાવરીની ધરપકડ કરી હતી.

આમ, પોલીસ તપાસમાં જોહરસીંગ અને તેનો ભાઇ વડોદરા શહેર, અમદાવાદ, આણંદ શહેરના વિવિધ પોલીસ સ્ટેશનોનાં 38 ગુનાઓમાં સંડોવાયેલા છે. પોલીસે તેઓની પાસેથી કાર સહિત કુલ રૂપિયા 2.15 લાખનો મુદ્દામાલ કબજે કરી વધુ તપાસ હાથ ધરી હતી.