મુંબઈનાં પાલઘરમાં એક ઇન્ડસ્ટ્રીયલ એસ્ટેટમાં બાંધકામ હેઠળની ફેકટરીમાં એક દુર્ઘટનાનાં સર્જાતા બે કામદારનાં મોત નીપજ્યા હતા, જ્યારે બે ઇજાગ્રસ્ત થયા હતા. પાલઘર પોલીસનાં સૂત્રોનાં જણાવ્યાનુસાર સોમવારે સવારે 11 વાગ્યે અહીંના એક ઇન્ડસ્ટ્રીયલ એસ્ટેટમાં આવેલ નિર્માણધીન ફેકટરીમાં બાંધકામ ચાલી રહ્યું હતું ત્યારે ક્રેનની મદદથી લોખંડનું સ્ટ્રકચર છત પર ગોઠવવામાં આવી રહ્યું હતું.

તે સમયે આ સ્ટ્રકચર તૂટીને પડતા તેની નીચે દબાઇ જવાથી બે કામદારનાં મોત થયા હતા, જ્યારે બે જણ ઘવાયા હતા. આ ઘટનામાં રામદ્દીન નિશાદ (ઉ.વ.41) અને રાહુલ નિશાદનું ઘટના સ્થળે જ મોત થયું હતું. આ ઘટના બાદ પોલીસે ઘટના સ્થળે દોડી જઇ પંચનામું હાથ ધરી બંને કામદારનાં મૃતદેહ પોસ્ટમોર્ટમ માટે મોકલી આપ્યા હતા. ઘટના અંગે પોલીસે અકસ્માત મૃત્યુનો ગુનો નોંધી વધુ તપાસ હાથ ધરી હતી.