સોનગઢ તાલુકાનાં બેડી ગામે આવેલ ખાતા નંબર 216, બ્લોક નંબર 186 વાળી ખેતીની જમીન પ્રિયંકાબેન અમિતભાઈ ગામીતની દાદી બાલુબેન વીરીયાભાઈ ગામીતનાં નામે આવેલ છે આ જમીન પૈકીની ત્રણ ક્યારી બાલુબેનને ખેડવા માટે અને એક ક્યારી પ્રિયંકાબેનને ખેડી ખેતી કરવા મળી છે. બાલુબેન (ઉ.વ.70) પ્રિયંકાબેન સાથે રહેતા હોવાથી તેમના ભાગની જમીન પ્રિયંકાબેન ખેડવા માટે જતા તેમના ભાઈ જોનીયલભાઈ ગમનભાઈ ગામીતે ખેતર ખેડવા અટકાવી હતી.

આ સમયે બંને ભાઈ-બહેન વચ્ચે બોલાચાલી થઈ હતી આ ઝઘડો અદાવત રાખી ગત તારીખ 28/03/2023નાં રોજ જોનીયલભાઈ ગામીત સાંજના સમયે પ્રિયંકાબેન ગામીતના ઘરે ગયો હતો અને, ‘તને તો અહીં રહેવા દેવાની નથી’ કહી પ્રિયંકાબેનના ઘરના ભીતનાં નળિયા તોડી રૂપિયા 15,000/-નું નુકસાન પહોંચાડ્યું હતું સાથે પ્રિયંકાબેન અને તેની દાદી બાલુબેન સાથે ગાળાગાળી કરી જાનથી મારી નાંખવાની ધમકી પણ આપી હતી. આ દરમિયાન ધક્કો મારી જમીન પર પાડી દેતા પ્રિયંકાબેન ગામીતને ઇજાઓ પહોંચી હતી જેથી આ બાબતે પ્રિયંકાબેન ગામીતે જોનીયલભાઈ ગામીત વિરુદ્ધ સોનગઢ પોલીસ મથકે ફરિયાદ નોંધાવી હતી.