મનિષા એસ. સુર્યવંશી/વ્યારા : સોનગઢ તાલુકાનાં ગુણસદા ગામનાં બરડીપાડા ફળિયામાં હેલીપેડ પાસેનાં રોડ ઉપરથી બાઈક પર દેશી દારૂનું વહન કરનાર એક યુવક ઝડપાતા કાર્યવાહી હાથ ધરવામાં આવી હતી. મળતી માહિતી મુજબ, ઉકાઈ પોલીસ સ્ટાફનાં માણસો શનિવારનાં રોજ ખાનગી વાહનમાં બેસી ટાઉન બીટ વિસ્તારમાં પ્રોહી. ગુના અંગેની વોચમાં પેટ્રોલીગમાં નીકળેલ હતા.

તે દરમિયાન ખાનગી રાહે બાતમી મળી હતી કે, બાઈકની ડીકીમાં એક ઈસમ દારૂનો જથ્થો લઈ સોનગઢ ગુણસદા થઈ ઉકાઈ તરફથી આવનાર છે. જે બાતમીનાં આધારે પોલીસ સ્ટાફનાં માણસો ગુણસદા સામે બરડીપાડા ફળિયામાં હેલીપેડ પાસે રોડ ઉપર વોચમાં હતા. તે દરમિયાન બાતમીવાળી બાઈક નંબર GJ/26/AC/1156 આવતાં જોઈ બાઈક ચાલકને ઈશારો કરી ઉભી રખાવી હતી અને પોલીસે બાઈક ચાલકને બાઈક ઉપરથી ઉતારી બાઈકની ડીકીમાં તપાસ કરતા વગર પાસ પરમીટે તેમાંથી દેશી દારૂની કુલ 40 નંગ બોટલો મળી આવી હતી.

ત્યારબાદ પોલીસે ચાલકનું નામ પૂછતા તેને પોતાનું નામ, વિકી ઉર્ફે રિકેશભાઈ રવિન્દ્રભાઈ ગામીત (ઉ.વ.19, હાલ રહે.ચંચરબુંદા ગામ, ટાંકલી ફળિયું, ઉચ્છલ, મૂળ રહે.સીંગપુર ગામ, મંદિર ફળિયું, સોનગઢ)નાં હોવાનું જણાવ્યું હતું. આમ, પોલીસે દેશી દારૂની બોટલો અને બાઈક મળી કુલ 22,000/-નો મુદ્દામાલ કબ્જે કર્યો હતો. બનાવ અંગે પોલીસ કર્મચારીની ફરિયાદનાં આધારે વિકી ઉર્ફે રિકેશ ગામીત વિરુદ્ધ ગુનો નોંધી કાર્યવાહી હાથ ધરી હતી.