મનિષા એસ. સુર્યવંશી/તાપી : સોનગઢનાં ચીખલી ભેંસરોટ ગામનાં ડુંગળી ફળિયામાં રહેતી એક મહિલા પોતાના ઘરે વગર પાસ પરમિટે ઇંગ્લિશ દારૂનું વેચાણ કરતા પોલીસ રેઈડમાં ઝડપાતા કાર્યવાહી હાથ ધરવામાં આવી હતી. મળતી માહિતી મુજબ, તાપી એલ.સી.બી. પોલીસ સ્ટાફનાં માણસો તારીખ 09/01/2024નાં રોજ સોનગઢ પોલીસ સ્ટેશન વિસ્તારમાં પ્રોહી. પેટ્રોલિંગમાં નીકળ્યા હતા. તે દરમિયાન ખાનગી રાહે બાતમી મળી હતી કે, ચીખલી ભેંસરોટ ગામનાં ડુંગળી ફળિયામાં રહેતી એક મહિલા પોતાના ઘરે ઇંગ્લિશ દારૂનું વેચાણ કરે છે.

જે બાતમીના આધારે પોલીસ સ્ટાફના માણસો સ્થળ પર પહોંચતા ત્યાં એક મહિલા હાજર મળી આવી હતી જેથી પોલીસે મહિલાનું નામ પૂછતા તેણે પોતાનું નામ, રેખાબેન જયેશભાઈ ગામીત (રહે.ચીખલી ભેંસરોટ ગામ, તા.સોનગઢ)નાં હોવાનું જણાવ્યું હતું ત્યારબાદ પોલીસે મહિલાના ઘરમાં તથા ઘરની આજુબાજુમાં તપાસ કરતાં ઘરની પાછળ આવેલ દાદર નીચે ચેક કરતા દાદર નીચે જમીનની અંદર ત્રણ માટલાઓ મુકેલ હતા અને તેમાં તપાસ કરતા તે ખાલી મળી આવ્યા હતા તેમજ ત્યારબાદ પાછળની સાઈડમાં આવેલ બાથરૂમની દીવાલની બાજુમાં જોતા જમીનની અંદર બે પ્લાસ્ટિકના ડ્રમમાં પણ ભારતીય બનાવટની વિદેશી દારૂની  કુલ 81 નંગ બોટલો મળી આવી હતી. બનાવ અંગે પોલીસ કર્મચારીની ફરિયાદના આધારે મહિલા વિરુદ્ધ ગુનો નોંધી આગળની કાર્યવાહી હાથ ધરવામાં આવી હતી.