સોનગઢ તાલુકાનાં રાણીઆંબા ગામે મુંબઇથી નીકળતાં વરલી મટકાના આંક પર કેટલાક ઈસમો જુગાર રમે છે જે બાતમીના આધારે પોલીસે રેડ કરી હતી. જોકે આ રેડ દરમિયાન કુલ ચાર ઈસમો ઝડપાઇ ગયા હતાં, જ્યારે આંકડાનું કટિંગ લેનાર આરોપીને વોન્ટેડ જાહેર કરવામાં આવ્યો હતો.

મળતી માહિતી અનુસાર, સોનગઢ પોલીસને બાતમી મળી હતી કે, રાણીઆંબા ગામે ટાંકી ફળિયામાં જાહેર રોડ નજીક કેટલાક ઈસમો મુંબઇથી નીકળતાં વરલી મટકાના આંક પર જુગાર રમે છે અને રમાડે છે. જે બાતમીનાં આધારે, રાણીઆંબાનાં ટાંકી ફળિયા નજીક શનિવારનાં રોજ બપોરે પોલીસે રેડ કરતાં સ્થળ ઉપરથી ચાર ઇસમો જુગાર રમતાં મળી આવ્યાં હતાં.

જેમાં અજયભાઈ સુમનભાઈ ગામીત (રહે.ટાંકી ફળિયું, રાણીઆંબા, સોનગઢ), ગોકુળભાઈ મોવલીયાભાઈ ગામીત (રહે.ટાંકી ફળિયું રાણીઆંબા ગામ, સોનગઢ), અમરતભાઈ રવજીભાઈ રાઠોડ (રહે.અંબિકા નગર, રાણીઆંબા ગામ, સોનગઢ) અને રમેશભાઈ મગનભાઈ ગામીત (રહે.પાંડર ફળિયું, રાણીઆંબા ગામ, સોનગઢ) નાને વરલી મટકાના આંક પર જુગાર રમતાં ઝડપી લીધા હતાં.

આ બનાવમાં પોલીસે આંકડાનો જુગાર રમાડી ભેગા કરેલા રોકડા રૂપિયા 7,430/- અને 5 નંગ મોબાઈલ તથા એક બાઈક અને આંકડાના જુગારનું સાહિત્ય સહિત કુલ રૂપિયા 53,430/-નો મુદ્દામાલ કબ્જે કરી કાયદેસરની કાર્યવાહી હાથ ધારી હતી, જયારે જયેશ શિમ્પી (રહે.હાથી ફળિયું, સોનગઢ) નાને વોન્ટેડ જાહેર કર્યો હતો.