વાલોડમાં પસાર થતા વાલોડ બાજીપુરા માર્ગ પર થયેલ અકસ્માતમાં બે મોટર સાઈકલ પર સવાર મિત્રોનો એક પછી એક સારવાર દરમિયાન મરણ પામ્યા હતા. સુત્રો પાસેથી મળતી માહિતી અનુસાર, વાલોડમાં પસાર થતો વાપી શામળાજી માર્ગ પર સાંજનાં સમયે મોટરસાયકલ ચાલક મનોજભાઈ ડાહ્યાભાઈ ધોડિયા (રહે.પુણા ગામ, તા.મહુવા) તથા નવીનભાઈ ભંગિયાભાઈ ધોડિયા તથા જીતુભાઈ મોહનભાઈ ધોડિયા (બંને રહે. કલકવા ગામ, તા.ડોલવણ) કલકવાથી બાઇક નંબર જીજે/19/સી/0299 લઇ બાજીપુરા તરફ જતા હતા.

તે સમયે વાલોડ બાજીપુરા રોડ ઉપર બુટવાડા ખાતે સામેથી બોલેરો પીકઅપ ટેમ્પો નંબર જીજે/6/બીટી/2980નાં ચાલકે પોતાનો ટેમ્પો પુરઝડપે અને ગફલતભરી રીતે હંકારી લાવી સ્પ્લેન્ડર મોટર સાઈકલને સામેથી ટક્કર મારી અકસ્માત કરી મોટરસાયકલ ચાલકને તથા તેના સાથીઓને હવામાં ફંગોળી દીધા હતા. જેમાં મોટરસાયકલ ચાલક મનોજભાઈ ડાહ્યાભાઈ ધોડિયાને શરીરે ગંભીર ઈજાઓ પહોંચાડતા તેઓનું વ્યારા ખાતે સારવાર દરમિયાન મોત નીપજ્યું હતું.

જોકે અન્ય મોટર સાઈકલ સવાર નવીનભાઈ ધોડિયા તથા જીતુભાઈ મોહનભાઈને શરીરે ગંભીર ઈજાઓ હોવાથી બંને મિત્રોને એક પછી એક સુરત ખાતે વધુ સારવાર અર્થે ખસેડવામાં આવ્યા હતા જ્યાં બંને  મિત્રોની હાલત ગંભીર હોય ગતરોજ સાંજે બંને મિત્રોને સુરત ખાતે સારવાર દરમિયાન મરણ પામ્યા હતા.