સુરતનાં ઝંખવાવ ખાતે રહેતા યુવક કાર લઈ બલેશ્વર ખાતે હાઇવે પરથી રાત્રી દરમિયાન પસાર થઈ રહ્યો હતો તે દરમિયાન અજાણ્યા વાહને કારને ટક્કર મારતા કાર ચાલકને ગંભીર ઇજાઓ થતાં ટૂંકી સારવાર દરમિયાન મોત નીપજ્યું હતુ. મળતી માહિતી અનુસાર, ઝંખવાવ ખાતે અબ્દુલ હમીદ હનીફ મુલતાની છૂટક કાર ડ્રાઇવિંગ કરે છે જેઓના લગ્ન હાલ બે મહિના પહેલા સમરાના સાથે થયા હતા હમીદ છેલ્લા પાંચ દિવસથી રહેમાન પઠાણ નામના શખ્સની વેગનાર કાર નંબર GJ/05/BT/3433 પર ડ્રાઇવિંગ કરતા હતા. જોકે ગત શનિવારે મોડી 11.30 વાગ્યાના અરસામાં રાતે તેઓ વેગનાર કાર લઈ અમદાવાદ મુંબઈ નેશનલ હાઈવે નંબર-48 પરથી પસાર થઈ રહ્યા હતા.

તે દરમિયાન બલેશ્વર ગામની સીમમાં સંસ્કાર વિદ્યાસંકુલની સામે અજાણ્યા વાહને કારને ટક્કર મારતા હમીદને માથાનાં ભાગે તેમજ જમણા હાથે પગે ગંભીર ઇજાઓ થઈ હતી જોકે આ ગંભીર અકસ્માતમાં ઘવાયેલા હમીદને 108 મારફતે બારડોલીની સરદાર સ્મારક હોસ્પિટલમાં ખસેડવામાં આવ્યો હતો જ્યાં તેઓનું રવિવારે બપોરનાં સમયે સારવાર દરમિયાન મોત નીપજ્યું હતુ. ઘટના અંગે મૃતકના મામા અયુબ મુલતાનીએ પલસાણા પોલીસ મથકના અજાણ્યા વાહન ચાલક વિરુદ્ધ ફરિયાદ આપી હતી.