પલસાણાનાં વરેલી ખાતે રહેતો યુવક મોટરસાયકલ લઈ નોકરીથી પરત ફરી રહ્યો હતો. તે દરમિયાન ટ્રક ચાલકે યુવકની મોટરસાયકલને અડફતે લેતા યુવાનનું ટૂંકી સારવાર દરમિયાન મોત નીપજ્યું હતુ. મળતી માહિતી અનુસાર, મૂળ ઉત્તરપ્રદેશનાં અને હાલ પલસાણા તાલુકાનાં વરેલી ગામે વલ્લભ નગરમાં 214 નંબરની રૂમમાં રહેતા પિન્ટુકુમાર નારદ નિશાદ (ઉ.વ.22)નાઓ સોમવારે મોડી રાતે મોટરસાયકલ નંબર GJ/05/GD/9312 પલસાણા ચાર રસ્તા પરથી પસાર થઈ રહ્યા હતા.

તે દરમિયાન અમદાવાદથી મુંબઈ તરફ જતી પુરઝડપે ટ્રક નંબર HR/55/S/0388નાં ચાલકે મોટરસાયકલને અડફતે લેતા મોટરસાયકલ ચાલક પિન્ટુકુમાર નિશાદને હાથે પગે ગંભીર ઇજાઓ થઈ હતી. જેથી કોઈ રાહદારીએ ઇજાગ્રસ્ત યુવાનને 108ની મદદથી સ્મીમેર હોસ્પિટલમાં ખસેડવામાં આવ્યો હતો જ્યાં ફરજ પરના તબીબે યુવકને મૃત જાહેર કર્યો હતો. ઘટના અંગે મૃતકનાં મિત્રએ ટ્રક ચાલક વિરુદ્ધ પલસાણા પોલીસ મથકમાં ફરિયાદ આપી હતી.