બારડોલીનાં મોતા ગામે હોસ્ટેલમાં રહેતાં પૌત્રને મળી પરત ફરી રહેલાં દાદાને બાઇકે અડફેટે લેતા સારવાર દરમિયાન તેમનું મોત નીપજ્યું હતું. બનવાની વિગત એવી છે કે, સોનગઢનાં ગુનખડી ગામે રહેતાં હાનજી ભાઈ ભેકરિયા ભાઈ ગામીત (ઉ.વ.63) ખેતી કરી જીવન ગુજરાન ચલાવતાં હતાં. તેઓ શુક્રવારે પોતાની એક્ટિવા મોપેડ પર પૌત્રી સ્નેહીકા ને બેસાડી બારડોલીના મોતા ગામે હોસ્ટેલમાં રહેતાં પૌત્ર એવાં સુનેહલ ગામીતને મળવા માટે ગયાં હતાં. દાદા અને પૌત્રી સુનેહલને મળીને બપોરે પરત સોનગઢ તરફ જવા નીકળ્યાં હતાં.

તે દરમિયાન નેશનલ હાઇવેના બારડોલીથી વ્યારા તરફ જતાં રોડ પર આવેલ નવા કિકવાડ ગામના બસ સ્ટોપ પાસે મોપેડ રસ્તાની સાઈડ પર પાર્ક કરી કુદરતી હાજતે જવા માટે રોકાયા હતાં. આ દરમિયાન હાઇવે પર બારડોલી તરફથી આવતી એક એવેન્જર બાઈક નંબર GJ/05/HS/9732નાં ચાલકે પોતાની બાઈક પૂરઝડપે હંકારી એક્ટિવા પાસે ઉભા રહેલાં હાનજીભાઈને અડફેટે લઈ લીધા હતાં. આ અકસ્માતનાં બનાવમાં તેમને માથામાં અને શરીરે ગંભીર ઇજા થતાં સારવાર અર્થે બારડોલીની સરદાર હોસ્પિટલમાં ખસેડાયા હતા. ત્યાંથી વધુ સારવાર માટે સુરતની એક ખાનગી હોસ્પિટલમાં લઈ જવામાં આવ્યાં હતાં, જ્યાં સારવાર દરમિયાન તેમનું મોત નીપજ્યું હતું.