સુરતનાં મહુવા તાલુકાનાં અનાવલ-મહુવા સ્ટેટ હાઇવે પર તરકાણી ગામની સીમમાં બાઈક અને ટ્રક વચ્ચે અકસ્માત સર્જાયો હતો. આ સર્જાયેલ અકસ્માતમાં બાઈકને આગ લાગી જવા પામી હતી અને બાઈક ચાલકને ગંભીર ઇજાઓ થતા તેનું સ્થળ ઉપર જ મોત નીપજ્યું હતું. મળતી માહિતી અનુસાર, મહુવા તાલુકાનાં વહેવલ ગામનાં દાજીડા ફળિયાનાં રહીશ રમેશભાઈ છગનભાઇ પટેલ (આશરે ઉ.વ.52) તેઓ અનાવલ-મહુવા સ્ટેટ હાઇવે પરથી પસાર થઈ રહ્યા હતા.

તે દરમિયાન તરકાણી ગામની સીમમાં ટ્રક નંબર GJ/5/V/1499 અને બાઈક નંબર GJ/21/E/6794 વચ્ચે ગંભીર અકસ્માત સર્જાયો હતો. જોકે આ અકસ્માતમાં બાઈકને આગ લાગી જતા બળીને ખાખ થઈ જવા પામી હતી અને બાઈક ચાલક રમેશભાઈ પટેલને ગંભીર ઇજાઓ થતાં તેનું કરુણ મોત નીપજ્યું હતું. ઘટનાની જાણ થતાં જ મહુવા પોલીસે ઘટના સ્થળે આવી વધુ કાયદેસરની કાર્યવાહી હાથ ધરી હતી.