ઉપરવાસમાં પડેલ ભારે વરસાદને કારણે ઉકાઈ ડેમમાં પાણીની આવક વધતા 97 હજાર ક્યુસેક પાણી છોડવામાં આવી રહ્યું છે. આથી તાપી નદીની જળ સપાટીમાં વધારો નોંધાયો છે. જેને પગલે બારડોલી તાલુકાનાં કડોદ નજીક આવેલ હરીપુરા કોઝવે પર પાણી ફરી વળતા વાહન વ્યવહાર માટે રસ્તો બંધ કરવામાં આવ્યો છે.

જોકે ચોમાસાની સિઝનમાં વારંવાર રસ્તો બંધ થતો હોય નદીને સામે પાર આવેલા માંડવી તાલુકા 14થી વધુ ગામોને પારાવાર મુશ્કેલીનો સામનો કરવો પડે છે. ઉકાઇ ડેમમાંથી છોડવામાં આવેલું પાણી કોઝવે ઉપર થી પસાર થવા લાગતા સુરત જિલ્લા કલેક્ટરે કોઝવે પરથી અવર જવર ન કરવાની સુચના વહેતી કરી હતી. કોઈ અનિચ્છનીય બનાવ ન બને તે માટે કોઝવેની બંને તરફ પોલીસ બંદોબસ્ત પણ ગોઠવી દેવામાં આવ્યો હતો.

ઉલ્લેખનીય છે કે, હરીપુરા કોઝવે પર દર ચોમાસે વારંવાર પાણી ફરી વળતા હોય કડોદ સાથે જોડાયેલા માંડવી તાલુકાના 14થી વધુ ગામોએ હાલાકી વેઠવાનો વારો આવે છે. કોઝવે ડૂબી જતા વિસ્તારના ગામોએ 25 કિલોમીટરથી વધુનો ચકરાવો લગાવવાની ફરજ પડે છે. ત્યારે સ્થાનિક લોકોની ઉંચો પુલ બનવાની માંગ ઉઠવા પામી છે.