સુરત ખાતે રહેતું દંપતી એક્ટિવા લઈ મુંબઈ મહાલક્ષ્મી દર્શનાર્થે ગયા હતા જ્યાંથી પરત ફરતી વખતે 10 દિવસ અગાઉ દંપતીને પલસાણા ખાતે હાઇવે પર મોપેડ સ્લીપ થતા અકસ્માત નડ્યો હતો જોકે ઘવાયેલા દંપતી પૈકી પત્નીનું સારવાર દરમિયાન મોત નીપજ્યું હતું. મળતી માહિતી અનુસાર, રાંદેર ખાતેનાં ગુજરાત હાઉસિંગ બોર્ડના ફ્લેટ નંબર-74માં રહેતા સંતોષ સીતારામ ભાગવત (ઉ.વ.60) અને પત્ની સુનિતાબેન સાથે એક્ટિવા મોપેડ નંબર GJ/05/ML/2171 લઈ દિવાળી બાદ વેકેશનમાં મુંબઈ દહાણુ ખાતે મહાલક્ષ્મી મંદિર ખાતે દર્શનાર્થે ગયા હતા.

જ્યાંથી ગત તા.25 ઓક્ટોબરનાં રોજ પોતાના ઘરે પરત ફરી રહ્યા હતા તે દરમીયાન મોડી રાતે નેશનલ હાઈવે નંબર-48 પર પલસાણા ગામની હદમાં હાઇવે પર હિમાલયા હોટલની સામે હાઇવે પર એક્ટિવા સ્લીપ થતા દંપતી રોડ પર પટકાયા હતા તે દરમિયાન બંનેને 108ની મદદથી સુરત સિવિલ હોસ્પિટલમાં સારવાર હેઠળ ખસેડવામાં આવ્યા હતા જ્યાં સુનિતાબેનનું શનિવારનાં રોજ સારવાર દરમિયાન મોત નીપજ્યું હતુ.ઘટના અંગે પલસાણા પોલીસે ગુનો નોંધી વધુ તપાસ હાથ ધરી હતી.