સુરતનાં કામરેજ તાલુકાનાં નવાગામમાં સુપડી ફળિયામાં બની રહેલા નવા મકાન બાબતે આજુબાજુમાં રહેતા બે પિતરાઈ ભાઈઓ વચ્ચે હદ બાબતે બોલાચાલી થયા બાદ બને પરિવાર સેન્ટિંગના સળિયા લઈ એકબીજા સાથે મારમારી કરતા એકબીજા વિરુદ્ધ ફરિયાદ નોંધાઈ હતી. સુત્રો પાસેથી મળતી માહિતી અનુસાર, કામરેજનાં નવાગામ ખાતે સુપડી ફળિયામાં રહેતા હસમુખભાઈ છનાભાઈ પટેલ જેઓ પોતાનું નવું મકાન બનાવી રહ્યા છે. જોકે ગત તા.31એ કરેલી માપણી આધારે તેઓ બાંધકામ કરવી રહ્યા હતા.

તે સમયે પડોશી કાકાભાઈ મનહરભાઈ નગીનભાઈ પટેલ અને તેનો પરિવાર હસમુખ પાસે આવ્યા અને પોતાની હદમાં સેન્ટિંગનું કામ કરાવવા માટે કહ્યું જે વાતને લઈ બને પરિવાર વચ્ચે રકઝક થયા બાદ મકાનમાં સેન્ટિગમાં વપરાતા સળિયા વડે બને પરિવાર એકબીજા સાથે ઝગડવા લાગ્યું જેમાં હસમુખભાઈ પટેલને તેમજ તેના પુત્ર રજતભાઈને ઇજાઓ થઈ હતી. જ્યારે સામે તરફ નીલેશભાઈ મનહરભાઈ પટેલને સામાન્ય ઇજાઓ થતાં બંને કાકા ભાઈનાં પરીવાર એકબીજા સામે કામરેજ પોલીસ મથકમાં ફરિયાદ આપી હતી.