ઓલપાડ ખાતે રાત્રી સમયે બ્રેક ડાઉન થયેલી ટ્રકની પાછળ બાઈક ચાલક ઘુસી જતા બાઈક ચાલકનું ઘટના સ્થળે કમકમાટી ભર્યું મોત નીપજ્યું હતુ. મળતી માહિતી અનુસાર, સુરત જિલ્લાનાં ઓલપાડ ખાતે રહેતા અરવિંદભાઈ ડાહ્યાભાઈ પટેલ ગત તા.31 ઓક્ટોબરના રોજ મોડી રાતે 10 વાગ્યાના અરસામાં પોતાની બાઈક નંબર GJ/05/BC/5307 લઈ કુંભારી ગામથી ઓલપાડ ખાતે આવી રહ્યા હતા.

તે દરમિયાન કુંભારી ગામની સીમમાં શિવકૃપા પેટ્રોલપંપની આગળ રસ્તા વચ્ચે ભયજનક સ્થિતિમાં ઉભેલી મીઠા ભરેલી ટ્રક નંબર GJ/01/CT/5307નાં પાછળ ધડાકાભેર અથડાઇ જતા અરવિંદભાઈને માથાના ભાગે અને પગના ભાગે ગંભીર ઇજાઓ થતા ઘટના સ્થળે મોત નીપજ્યું હતુ. ઘટના અંગે મૃતકના ભત્રીજા વિશાલ પટેલે ઓલપાડ પોલીસ મથકના ટ્રક ચાલક વિરુદ્ધ ફરિયાદ નોંધાવી હતી.