સુરતમાં એક સ્કૂલ વેનને અકસ્માત નડ્યો જયારે અન્ય કાર ચાલકની બેદરકારીથી સ્કૂીલ વેન પલટી ગઈ હતી જેથી તેમાં બેઠેલા વિદ્યાર્થીઓને સામાન્ય ઈજા પહોંચી હતી. બાળકોને નજીકની હોસ્પિટલમાં ખસેડવામાં આવ્યા. સ્કૂલ વેન પલટી ખાઈ જવાની જાણ થતાં વિદ્યાર્થીઓના વાલીઓના જીવ તાળવે ચોંટી ગયા હતાં.

મળતી માહિતી પ્રમાણે, ડભોલી વિસ્તારમાં આવેલ એલ.પી.સવાણી રોડ પર વાત્સ્લય સ્કૂલના સાત જેટલા વિદ્યાર્થી ભરેલી વેન પલટી મારી ગઈ હતી. અન્ય એક કારે સ્કૂલ વેનને ટક્કર મારી હતી, જેથી સ્કૂલ વેનના ડ્રાઈવરે સ્ટેરીંગ પરથી કાબૂ ગુમાવી દીધો હતો, જેના કારણે વેન પલટી ગઈ હતી. ઘટના બાદ આસપાસના લોકોનું ટોળુ એકઠું થઈ ગયું હતું, જેમણે બાળકોને સલામત રીતે બહાર કાઢ્યા હતા. બાદમાં ઈજાગ્રસ્ત બાળકોને હોસ્પિટલ ખસેડવામાં આવ્યા હતા. સમગ્ર ઘટનાને લઈને હોબાળો મચી જવા પામ્યો હતો. જોકે આ ઘટનામાં કોઈ મોટી જાનહાની થઈ ન હતી, ઘટનાની જાણ વાલીઓને થતાં ઈજાગ્રસ્ત તેઓ તાત્કાલિક હોસ્પિટલમાં પહોંચ્યા હતા. બનાવ અંગે સિંગણપોર પોલીસે સમગ્ર મામલે વધુ તપાસ હાથ ધરી હતી.