વલસાડ એલ.સી.બી પોલીસ ટીમે વાપી રેલવે અંડરપાસ પાસે આવી વોચ ગોઠવી હતી. તે સમયે પોલીસને જોતા જ એક બ્રેજા કારનો ચાલક કાર અંડરપાસમાં વચ્ચે જ ટ્રાફિકમાં કાર મૂકી નાસી છૂટયો હતો. ત્યારબાદ પોલીસે કારમાં તપાસ કરતા અંદરથી ૧.૨૭ લાખનો દારૂનો જથ્થો મળી આવ્યો હતો. મળતી માહિતી મુજબ, વલસાડ લોકલ ક્રાઈમ બ્રાન્ચની ટીમ વાપી વિસ્તારમાં પેટ્રોલિંગમાં હતી.

તે સમયે તેને બાતમી મળી હતી કે, એક લાલ કલરની મારુતિ સુઝુકી બ્રેજા કારનો ચાલક દમણથી દારૂનો જથ્થો ભરીને વાપી રેલવે અંડરપાસ તરફ જનાર છે. જે બાતમીને આધારે પોલીસે વોચ ગોઠવી હતી તે દરમિયાન અંડરપાસ પાસે બાતમીવાળી કાર આવતી જણાતા પોલીસે ખાનગી વાહન આડું કરી ટ્રાફિકજામ કરી દીધો હતો. જ્યારે બ્રેઝા કારનો ચાલક પણ આ સમયે પોલીસને જોઈ ગયો હતો. તેથી તે કારને અંડરપાસમાં ટ્રાફિકમાં મૂકી કારમાંથી ઉતરી નાસી છૂટયો હતો. આખરે પોલીસે કારને ટ્રાફિકમાંથી બહાર કાઢીને તપાસ હાથ ધરી હતી. આ સમયે કારમાંથી ભારતીય બનાવટના વિદેશી દારૂની બાટલીઓ નંગ ૩૩૯ જેની કિંમત રૂપિયા ૧,૨૭,૨૦૦/- મળી આવી હતી. આ સાથે જ એલસીબીએ દારૂનો જથ્થો તથા કાર મળી કુલ રૂપિયા  ૪,૨૭,૨૦૦/-નો મુદ્દામાલ જપ્ત કર્યો હતો.