કામરેજ પોલીસે વલથાણ હાઇવે પર વોચ ગોઠવી અર્ટીગા કારમાંથી 16 હજાર કિંમતનાં વિદેશી દારૂ સાથે સૌરાષ્ટ્રનાં બે ઇસમોને ઝડપી પાડી કાર્યવાહી હાથ ધરી હતી. સુત્રો પાસેથી મળતી માહિતી મુજબ, ગ્રે કલરની અર્ટીગા કાર નંબર GJ/38/BB/6504માં મહારાષ્ટ્રથી વિદેશી દારૂનો જથ્થો ભરી ભાવનગર તરફ જનાર હોવાની કામરેજ પોલીસને બાતમી મળી હતી.

પોલીસે વલથાણ નેશનલ હાઈવે નંબર-4 પર વોચ ગોઠવી બાતમી મુજબની કાર અટકાવી તપાસ કરતા તેમાંથી વિદશી દારૂનો જથ્થો મળી આવ્યો હતો. જોકે પોલીસે 16 હજારની વિદેશી દારૂની 91 નાની-મોટી બોટલો, 8 હજાર કિંમતનાં 2 નંગ મોબાઈલ અને 5 લાખ કિંમતની કાર મળી પોલીસે કુલ 5.24 લાખનો મુદ્દામાલ કબ્જે કર્યો હતો. ત્યારબાદ પોલીસે દારૂની ખેપ મારનાર જગદીશ કાનજી સરકડીયા અને  રામજી નાગર પાટોડીયા (બંને રહે.પાટણા ગામ, જિ.ભાવનગર)નાંની ધરપકડ કરી કાયદેસરની કાર્યવાહી હાથ ધરી હતી.